దోహా: ఖతార్‌లో నిబంధనలను పాటించని ట్రావెల్, ఎయిర్ కార్గో ఏజెన్సీలపై ఖతార్ సివిల్ ఏవియేషన్ అథారిటీ (QCAA) కఠిన చర్యలు చేపట్టింది. ఎయిర్ ట్రాన్స్‌పోర్ట్ విభాగం ఆధ్వర్యంలో రెండు ట్రావెల్, ఎయిర్ కార్గో ఏజెన్సీలను పరిపాలనా పరంగా మూసివేయడంతో పాటు మరో 10 ఏజెన్సీల నమోదును రద్దు చేసింది. విమాన రవాణా రంగంలో పర్యవేక్షణను మరింత బలోపేతం చేసే చర్యల్లో భాగంగా నిర్వహించిన తనిఖీల్లో ఆయా ఏజెన్సీలు నిబంధనలను ఉల్లంఘించినట్లు గుర్తించినట్లు QCAA వెల్లడించింది.

ఈ సందర్భంగా అన్ని ట్రావెల్, ఎయిర్ కార్గో ఏజెన్సీలు అమల్లో ఉన్న చట్టాలు, నిబంధనలను తప్పనిసరిగా పాటించాలని అధికారులు సూచించారు. సంబంధిత అధికార విభాగం నుంచి అవసరమైన లైసెన్సులు పొందకుండా ట్రావెల్ లేదా ఎయిర్ కార్గో సేవలు నిర్వహించరాదని హెచ్చరించారు. 2025 నాటి చట్టం నంబర్-3లోని ఆర్టికల్-3 ప్రకారం అనుమతులు లేకుండా కార్యకలాపాలు నిర్వహించే సంస్థలపై కఠిన చర్యలు కొనసాగుతాయని ఖతార్ సివిల్ ఏవియేషన్ అథారిటీ స్పష్టం చేసింది.