తెలంగాణ ప్రభుత్వం కుటుంబాలకు సంబంధించిన వివరాలను ఒకే అధికారిక పత్రంలో అందుబాటులో ఉంచే లక్ష్యంతో ఫ్యామిలీ రిజిస్టర్ సర్టిఫికెట్ జారీకి సంబంధించి జీవో విడుదల చేసింది. రాష్ట్రంలోని ప్రతి కుటుంబానికి ఈ సర్టిఫికెట్‌ను జారీ చేయనున్నట్లు ప్రభుత్వం (Family Register Certificate) ప్రకటించింది. వివిధ ప్రభుత్వ పథకాలు, సంక్షేమ కార్యక్రమాలు, ధ్రువీకరణ ప్రక్రియల్లో కుటుంబ వివరాలను పదేపదే సమర్పించాల్సిన అవసరాన్ని తగ్గించడమే ఈ నిర్ణయం వెనుక ప్రధాన ఉద్దేశంగా ప్రభుత్వం పేర్కొంది.

ప్రభుత్వ సేవలు, సంక్షేమ పథకాల కోసం:
ప్రస్తుతం ప్రభుత్వ సేవలు, సంక్షేమ పథకాల కోసం దరఖాస్తు చేసేటప్పుడు కుటుంబ సభ్యుల వివరాలు, ఆధార్ నంబర్లు, చిరునామా, కుటుంబ పెద్ద వివరాలు వంటి సమాచారాన్ని వేర్వేరుగా సమర్పించాల్సి వస్తోంది. దీంతో ప్రజలు అనేక ఇబ్బందులు ఎదుర్కొంటున్నారు. ఈ సమస్యకు శాశ్వత పరిష్కారంగా ఫ్యామిలీ రిజిస్టర్ సర్టిఫికెట్ ఉపయోగపడుతుందని అధికారులు వెల్లడించారు.

ఈ సర్టిఫికెట్‌లో ప్రతి కుటుంబానికి ప్రత్యేక ఫ్యామిలీ ఐడీ నంబర్, కుటుంబ పెద్ద పేరు, కుటుంబ సభ్యుల వివరాలు, వారి ఆధార్ నంబర్లు, నివాస చిరునామా వంటి సమాచారం నమోదు చేయబడుతుంది. దీనివల్ల ప్రభుత్వ శాఖలు ఒకే పత్రం ఆధారంగా కుటుంబ వివరాలను ధ్రువీకరించుకునే అవకాశం ఉంటుంది. అలాగే వివిధ సేవల కోసం పత్రాల సమర్పణ ప్రక్రియ కూడా మరింత సులభతరం కానుంది.

ప్రభుత్వం ప్రకారం, ఫ్యామిలీ రిజిస్టర్ సర్టిఫికెట్ తెలంగాణలో ప్రతి కుటుంబానికి ఒక అధికారిక గుర్తింపు పత్రంగా ఉపయోగపడుతుంది. భవిష్యత్తులో ప్రభుత్వ సంక్షేమ పథకాలు, ఆదాయ ధ్రువీకరణ, నివాస ధ్రువీకరణ, ఇతర పరిపాలనా సేవల్లో కూడా దీనికి ప్రాధాన్యం ఉండే అవకాశం ఉంది. ఈ నిర్ణయంతో ప్రభుత్వ సేవలను మరింత పారదర్శకంగా, వేగంగా ప్రజలకు అందించడంతో పాటు కుటుంబ వివరాల నిర్వహణలో ఏకరీతి విధానం అమలులోకి వస్తుందని అధికారులు భావిస్తున్నారు.