హైదరాబాద్: తెలుగు సినీ పరిశ్రమలో తనదైన విలక్షణ నటనతో, హాస్యంతో ప్రేక్షకులను అలరించిన ప్రముఖ క్యారెక్టర్ ఆర్టిస్ట్, సీనియర్ నటి పావలా శ్యామల ఇక లేరు.గత కొంతకాలంగా తీవ్ర అనారోగ్యం, వృద్ధాప్య సమస్యలు మరియు ఆర్థిక ఇబ్బందులతో బాధపడుతున్న ఆమె హైదరాబాద్‌లోని ఉస్మానియా ఆసుపత్రిలో చికిత్స పొందుతూ మంగళవారం తెల్లవారుజామున కన్నుమూశారు.

తీవ్రమైన గుండెపోటుతో కన్నుమూత

ఉస్మానియా ఆసుపత్రిలో చికిత్స పొందుతున్న పావలా శ్యామలకు మంగళవారం తెల్లవారుజామున 1:52 గంటల సమయంలో తీవ్రమైన గుండెపోటు (Heart Attack) రావడం వల్ల మరణించినట్లు వైద్యులు అధికారికంగా ధృవీకరించారు. ప్రస్తుతం ఆమె భౌతికకాయాన్ని ఆసుపత్రిలోని మార్చురీలో భద్రపరిచారు.

కుమార్తె దీనస్థితి..ముందుకు వచ్చిన ‘మా’ (MAA)

ఒకప్పుడు వెండితెరపై ఎన్నో వైవిధ్యమైన పాత్రలతో నవ్వులు పూయించిన పావలా శ్యామల చివరి రోజుల్లో తీవ్ర ఆర్థిక సవాళ్లతో దయనీయమైన జీవితాన్ని గడిపారు. శ్యామలా గారితోనే ఉంటున్న ఆమె కుమార్తె కూడా ప్రస్తుతం తీవ్రమైన అనారోగ్య సమస్యలతో బాధపడుతున్నారు. కుమార్తె పరిస్థితి దృష్ట్యా, ఆమె అంత్యక్రియల నిర్వహణ బాధ్యతను మూవీ ఆర్టిస్ట్ అసోసియేషన్ (‘మా’) స్వీకరించింది. ‘మా’ తరఫున పూర్తి సొంత ఖర్చులతో ఈ అంత్యక్రియలను నిర్వహించనున్నారు. ప్రముఖ నటి కరాటే కళ్యాణి దగ్గరుండి ఈ అంతిమ సంస్కారాల పూర్తి బాధ్యతలను చూసుకోనున్నట్లు ఒక వీడియో ద్వారా స్పష్టం చేశారు. పావలా శ్యామల గారి మృతి పట్ల తెలుగు చిత్ర పరిశ్రమ తీవ్ర దిగ్భ్రాంతిని, సంతాపాన్ని వ్యక్తం చేసింది. చివరి రోజుల్లో ఆమె పడిన కష్టాలు, దయనీయ స్థితి సినీ వర్గాలను మరియు అభిమానులను తీవ్రంగా కలచివేస్తున్నాయి.