మస్కట్: అర్హత ఉన్న భారతీయ పౌరులందరికీ పూర్తి కాలవ్యవధితో 10 ఏళ్ల చెల్లుబాటు కలిగిన పాస్‌పోర్టు పొందే హక్కు ఉందని ఒమన్‌లో భారత రాయబారి హెచ్‌ఈ ప్రశాంత్ పిసే స్పష్టం చేశారు. వ్యక్తి వృత్తి, ఉద్యోగం లేదా సామాజిక స్థితితో సంబంధం లేకుండా అర్హత ప్రమాణాలు పూర్తి చేసిన ప్రతి భారతీయుడికి పూర్తి కాల పాస్‌పోర్టు జారీ చేయాల్సి ఉంటుందని తెలిపారు. గతంలో కొంతమంది కార్మికులకు తక్కువ కాలవ్యవధి కలిగిన పాస్‌పోర్టులు జారీ చేసే విధానం ఉండగా, ప్రస్తుతం భారత మిషన్ వైఖరి స్పష్టంగా ఉందని ఆయన తెలిపారు. ఓ ప్రత్యేక ఇంటర్వ్యూలో రాయబారి ఈ విషయాన్ని వెల్లడించారు.

ఎమిగ్రేషన్ చెక్ రిక్వైర్డ్ (ECR) లేదా ఎమిగ్రేషన్ చెక్ నాట్ రిక్వైర్డ్ (ECNR) కేటగిరీలో ఉన్నప్పటికీ, పాస్‌పోర్టు జారీకి అవసరమైన అన్ని నిబంధనలు పూర్తి చేసిన భారతీయ పౌరులు పూర్తి కాలవ్యవధి పాస్‌పోర్టుకు అర్హులేనని ప్రశాంత్ పిసే పేర్కొన్నారు. “అర్హత ఉన్న భారతీయులందరికీ పూర్తి కాలవ్యవధి పాస్‌పోర్టు పొందే హక్కు ఉంది” అని ఆయన స్పష్టం చేశారు. పాస్‌పోర్టు చెల్లుబాటు వ్యవధిని వ్యక్తి చేస్తున్న ఉద్యోగం లేదా వృత్తితో అనుసంధానం చేయకూడదని తెలిపారు. అయితే, చెల్లుబాటు అయ్యే పత్రాలు లేకపోవడం లేదా పోలీస్ వెరిఫికేషన్ స్పష్టంగా లేకపోవడం వంటి కొన్ని ప్రత్యేక సందర్భాల్లో మాత్రం తక్కువ కాలవ్యవధి పాస్‌పోర్టును పరిగణనలోకి తీసుకునే అవకాశం ఉందని రాయబారి వివరించారు.

గతంలో కొన్ని సందర్భాల్లో కార్మికుల ప్రయోజనాలను కాపాడటానికే తక్కువ కాలవ్యవధి కలిగిన పాస్‌పోర్టులు జారీ చేసినట్టు తెలిపారు. ప్రస్తుతం మాత్రం అర్హత ప్రమాణాలను పూర్తి చేసిన భారతీయుల విషయంలో వారి వృత్తి లేదా ఉద్యోగ స్థితి ఆధారంగా పాస్‌పోర్టు చెల్లుబాటు వ్యవధిని తగ్గించే విధానం ఉండకూడదనే స్పష్టమైన వైఖరిని భారత మిషన్ తీసుకున్నట్లు ఆయన పేర్కొన్నారు.