అబ్హా: సౌదీ అరేబియాలో అంతరించిపోయే ప్రమాదంలో ఉన్న అడవి జంతువు ఐబెక్స్‌ను వేటాడిన వ్యక్తిని అసీర్‌ పోలీసులు అరెస్ట్‌ చేశారు. అసీర్‌ ఎన్విరాన్‌మెంటల్‌ సెక్యూరిటీ స్పెషల్‌ ఫోర్సెస్‌ సహకారంతో నిందితుడు హుస్సేన్‌ దాఫెర్‌ హుస్సేన్‌ అల్‌-ఖహ్తానీని అదుపులోకి తీసుకున్నట్లు అధికారులు తెలిపారు. అతని వద్ద నుంచి ఒక పిస్టల్‌, వివిధ రకాల 20 రౌండ్ల మందుగుండు సామగ్రి, నాలుగు అడవి జంతువులు స్వాధీనం చేసుకున్నారు. అవసరమైన చట్టపరమైన ప్రక్రియలు పూర్తి చేసిన అనంతరం నిందితుడిని సంబంధిత అధికారులకు అప్పగించినట్లు వెల్లడించారు.

అడవి జంతువులను వేటాడటాన్ని సౌదీ పర్యావరణ చట్టం, దాని అమలు నిబంధనలు నిషేధిస్తున్నాయని పబ్లిక్‌ సెక్యూరిటీ అధికారులు తెలిపారు. ఐబెక్స్‌ను వేటాడితే 60 వేల సౌదీ రియాల్స్‌ వరకు జరిమానా విధించవచ్చని పేర్కొన్నారు. లైసెన్స్ లేకుండా వేటాడితే 10 వేల రియాల్స్‌, నిషేధిత ప్రాంతాల్లో వేటాడితే 5 వేల రియాల్స్‌ జరిమానా విధించే నిబంధనలు ఉన్నాయని తెలిపారు.

పర్యావరణం, వన్యప్రాణులకు సంబంధించిన ఉల్లంఘనలు కనిపిస్తే ప్రజలు వెంటనే అధికారులకు సమాచారం ఇవ్వాలని పబ్లిక్‌ సెక్యూరిటీ విజ్ఞప్తి చేసింది. మక్కా, మదీనా, రియాద్‌, తూర్పు ప్రావిన్స్‌లలో 911కు, ఇతర ప్రాంతాల్లో 999 లేదా 996కు ఫోన్‌ చేసి సమాచారం అందించాలని కోరింది. సమాచారం అందించే వారి వివరాలను పూర్తిగా గోప్యంగా ఉంటాయని అధికారులు స్పష్టం చేశారు.