అజ్మాన్: పాఠశాలల 2026–27 విద్యా సంవత్సరం ప్రారంభం సందర్భంగా అజ్మాన్ ప్రభుత్వం తల్లిదండ్రులైన ప్రభుత్వ ఉద్యోగులకు ప్రత్యేక పని వేళల సౌలభ్యాన్ని ప్రకటించింది. పిల్లలను పాఠశాలకు తీసుకెళ్లడం లేదా తిరిగి తీసుకురావడం కోసం ఉద్యోగులు రోజుకు గరిష్ఠంగా మూడు గంటల వరకు ఆలస్యంగా విధులకు హాజరుకావడం లేదా ముందుగా విధుల నుంచి వెళ్లేందుకు అనుమతి కల్పించారు.

అజ్మాన్ ప్రభుత్వ మానవ వనరుల విభాగం జారీ చేసిన సర్క్యులర్ ప్రకారం, నర్సరీలు లేదా కిండర్‌గార్టెన్లలో చదువుతున్న చిన్నారుల తల్లిదండ్రులకు ఈ సౌలభ్యం విద్యా సంవత్సరం తొలి వారం మొత్తం వర్తిస్తుంది.

ప్రాథమిక పాఠశాల మరియు అంతకంటే పై తరగతుల్లో చదువుతున్న పిల్లల తల్లిదండ్రులకు మాత్రం ఈ వెసులుబాటు పాఠశాలలు ప్రారంభమయ్యే తొలి రోజుకే పరిమితం అవుతుంది.

పిల్లల పాఠశాల ప్రారంభ సమయాలను సంబంధిత పాఠ్యప్రణాళికకు అనుగుణంగా పరిగణనలోకి తీసుకుంటారు. ఉద్యోగులు పొందే ప్రత్యేక అనుమతులను ‘మవారెద్ అజ్మాన్’ (Mawared Ajman) యాప్‌లో తప్పనిసరిగా నమోదు చేయాల్సి ఉంటుంది.

ఈ సర్క్యులర్ అమలు, ఉద్యోగులకు అనుమతుల పర్యవేక్షణ బాధ్యతలను సంబంధిత ప్రభుత్వ విభాగాల మానవ వనరుల యూనిట్లు నిర్వహించనున్నాయి.

పాఠశాలల పునఃప్రారంభ సమయంలో తల్లిదండ్రులైన ఉద్యోగులు తమ పిల్లల రవాణా, పాఠశాల ఏర్పాట్లను సమన్వయం చేసుకోవడానికి ఈ నిర్ణయం తోడ్పడనుంది.