దుబాయ్: విద్యార్థుల భద్రతకు మరింత ప్రాధాన్యతనిస్తూ దుబాయ్ పోలీస్ కీలక చర్యలు చేపట్టింది. నగరంలోని 35 పాఠశాలల్లో పనిచేస్తున్న 140 మందికి పైగా సెక్యూరిటీ గార్డులకు ట్రాఫిక్ భద్రతా నిబంధనలు, మార్గదర్శకాలపై శిక్షణ, అవగాహన కార్యక్రమాలను నిర్వహించింది.

పాఠశాలల వద్ద వాహనాల రాకపోకలను సమర్థంగా నియంత్రించడంతో పాటు, విద్యార్థుల భద్రతను పాఠశాల లోపల, పరిసర ప్రాంతాల్లో మరింత బలోపేతం చేయడం ఈ శిక్షణ కార్యక్రమాల ప్రధాన ఉద్దేశమని దుబాయ్ పోలీస్ తెలిపింది.

దుబాయ్ పోలీస్ జనరల్ డిపార్ట్‌మెంట్ ఆఫ్ ట్రాఫిక్ డైరెక్టర్ బ్రిగేడియర్ జుమా సలేం బిన్ సువైదాన్ మాట్లాడుతూ.. వివిధ సంస్థలతో భాగస్వామ్యాన్ని బలోపేతం చేయడంలో భాగంగానే ఈ వర్క్‌షాప్‌లను నిర్వహిస్తున్నట్లు తెలిపారు. పాఠశాలల్లో విధులు నిర్వహించే సెక్యూరిటీ సూపర్‌వైజర్లు ఎదుర్కొనే ట్రాఫిక్ సమస్యలను సమర్థంగా పరిష్కరించేందుకు ఈ శిక్షణ ఉపయోగపడుతుందని చెప్పారు.

చిన్నపాటి ట్రాఫిక్ ఘటనలు జరిగినప్పుడు సంబంధిత అధికారులు వచ్చే వరకు తీసుకోవాల్సిన ప్రాథమిక చర్యలపై కూడా సిబ్బందికి అవగాహన కల్పిస్తున్నట్లు ఆయన తెలిపారు. దీనివల్ల ట్రాఫిక్ రాకపోకలు సజావుగా సాగడంతో పాటు భద్రతా ప్రమాణాలు మెరుగుపడతాయని పేర్కొన్నారు.

చిన్నపాటి ప్రమాదాల నిర్వహణపై శిక్షణ

ఫస్ట్ వారెంట్ ఆఫీసర్ అహ్మద్ మొహమ్మద్ ఖలఫ్ ఆధ్వర్యంలో శిక్షణా కార్యక్రమాలు నిర్వహించారు. పాఠశాల పరిసరాల్లో సంభవించే చిన్నపాటి రోడ్డు ప్రమాదాల రకాలు, వాటిని ఎలా నిర్వహించాలి, ప్రమాదాలను ఎలా నివేదించాలి వంటి అంశాలను వివరించారు.

ట్రాఫిక్ ప్రమాదాలను దుబాయ్ పోలీస్ స్మార్ట్ యాప్ ‘We Are All Police’ ద్వారా నివేదించే విధానాన్ని కూడా సిబ్బందికి నేర్పించారు.

అదేవిధంగా ట్రాఫిక్ సిగ్నళ్లు, రహదారి సూచికలు, భద్రతా మార్గదర్శకాలపై అవగాహన కల్పించారు. ముఖ్యంగా ఉదయం విద్యార్థులను పాఠశాలకు దింపే సమయంలో, మధ్యాహ్నం లేదా సాయంత్రం పాఠశాల నుంచి తీసుకెళ్లే సమయంలో ఏర్పడే రద్దీని ఎలా నియంత్రించాలనే అంశంపై ప్రత్యేక శిక్షణ ఇచ్చారు.

ప్రాక్టికల్ శిక్షణ

శిక్షణలో భాగంగా సెక్యూరిటీ గార్డులకు వాస్తవ పరిస్థితులను అనుకరించేలా ట్రాఫిక్ ప్రమాదాలపై ప్రాక్టికల్ సన్నివేశాలను నిర్వహించారు. ప్రమాదం జరిగినప్పుడు ఎలా స్పందించాలి, పరిస్థితిని ఎలా అదుపులో ఉంచాలి అనే అంశాలను ప్రాక్టికల్‌గా వివరించారు.

అలాగే స్కూల్ బస్సుల్లో విద్యార్థులు సురక్షితంగా ఎక్కడం, దిగడం వంటి అంశాలపై కూడా శిక్షణ ఇచ్చారు. ట్రాఫిక్ లేదా భద్రతకు సంబంధించిన అత్యవసర పరిస్థితులు ఎదురైనప్పుడు సంబంధిత అధికారులకు సమాచారం అందే వరకు సిబ్బంది ఎలా తక్షణం, బాధ్యతాయుతంగా స్పందించాలనే దానిపై కూడా మార్గదర్శకాలు అందించారు.

పాఠశాలల వద్ద విద్యార్థుల భద్రతను మరింత పెంచేందుకు, ట్రాఫిక్ నిర్వహణలో సెక్యూరిటీ సిబ్బంది సామర్థ్యాన్ని మెరుగుపరచేందుకు ఇలాంటి కార్యక్రమాలు కొనసాగిస్తామని దుబాయ్ పోలీస్ వెల్లడించింది.