సౌదీ అరేబియా: ముస్లిం వరల్డ్ లీగ్ (MWL) సెక్రటరీ జనరల్, ఆర్గనైజేషన్ ఆఫ్ ముస్లిం స్కాలర్స్ చైర్మన్ షేక్ డాక్టర్ మొహమ్మద్ అల్-ఇస్సాతో భారత రాయబారి విపుల్ భేటీ అయ్యారు. ఈ సందర్భంగా ఇరు పక్షాలు పరస్పర ఆసక్తికి సంబంధించిన పలు అంశాలపై అభిప్రాయాలను పంచుకున్నారు.

భేటీలో అంతర్జాతీయ సామరస్యం, మతాంతర సంభాషణ, వివిధ వర్గాల మధ్య పరస్పర అవగాహన, విశ్వ సోదరభావం వంటి అంశాలపై చర్చ జరిగినట్లు భారత విదేశాంగ మంత్రిత్వ శాఖ (MEA) తెలిపింది.

ఈ సందర్భంగా రాయబారి విపుల్.. 2023లో షేక్ అల్-ఇస్సా భారత్‌లో చేపట్టిన చారిత్రాత్మక పర్యటనను గుర్తుచేశారు. భారత్‌-ముస్లిం వరల్డ్ లీగ్ మధ్య సంబంధాలను బలోపేతం చేయడంలో ఆ పర్యటనకు ఉన్న ప్రాధాన్యతను ఆయన ప్రస్తావించారు.

ప్రపంచవ్యాప్తంగా సామరస్యాన్ని ప్రోత్సహించడం, మతాంతర సంభాషణను బలోపేతం చేయడం, విశ్వ సోదరభావ విలువలను ముందుకు తీసుకెళ్లడంలో ముస్లిం వరల్డ్ లీగ్ పోషిస్తున్న కీలక పాత్రను రాయబారి విపుల్ ప్రశంసించారు.

పరస్పర అవగాహన, సహకారం ద్వారా ప్రపంచంలో శాంతి, సామరస్యాన్ని మరింత బలోపేతం చేయాల్సిన అవసరాన్ని ఈ సమావేశం ప్రతిబింబించింది.