భారతదేశ విదేశీ వ్యవహారాల శాఖ మంత్రి సుష్మా స్వరాజ్‌, ట్విట్టర్‌ ద్వారా అబుదాబీకి చెందిన ఓ బాలిక చేసిన రిక్వెస్ట్‌పై స్పందించారు. తన తండ్రి, ఓ కుట్ర కేసులో ఇరుక్కున్నారనీ, ఆ కేసుతో తన తండ్రికి సంబంధం లేదనీ, తమ కుటుంబాన్ని ఆదుకోవాలనీ అంజలి మోహన్‌ అనే 16 ఏళ్ళ బాలిక సుష్మా స్వరాజ్‌ని ట్విట్టర్‌లో కోరారు. వెంటనే స్పందించిన సుష్మా స్వరాజ్‌, ఈ విషయాన్ని రాయబారి దృష్టికి తీసుకెళ్తామనీ, అబుదాబీలోని ఇండియన్‌ ఎంబసీ తగిన చర్యలు తీసుకుంటుందని పేర్కొన్నారు. విదేశాల్లోని భారతీయులు ఇబ్బందికర పరిస్థితుల్లో ఉంటే వెంటనే స్పందిస్తామని ఈ సందర్భంగా చెప్పారు సుష్మా స్వరాజ్‌. సోషల్‌ మీడియా ద్వారా ఎందరో సమస్యల్లో చిక్కుకున్నవారి గురించి తెలుస్తోందనీ, ఇది ఓ మంచి ప్లాట్‌ఫామ్‌ అని ఆమె అన్నారు. సమస్యల్లో ఉన్నవారెవరైనా సోషల్‌ మీడియా ద్వారా తమ సమస్యల్ని చెప్పగలిగితే వీలైనంతవరకు వారికి సహాయపడేందుకు తాము ముందుంటామని ఆమె తెలిపారు.