దోహా: ఖతార్ నేషనల్ విజన్ (QNV) 2030 లక్ష్యాల సాధన దిశగా దేశంలోని ఇంధన ఉత్పత్తి, రవాణా వ్యవస్థల్లో సమగ్ర హరిత పరివర్తనకు చర్యలు చేపడుతున్నట్లు నేషనల్ ప్లానింగ్ కౌన్సిల్ (NPC) వెల్లడించింది. దేశ మూడో జాతీయ అభివృద్ధి వ్యూహం (NDS3)లో భాగంగా అధునాతన సాంకేతికతలతో ఆర్థికాభివృద్ధి, పర్యావరణ పరిరక్షణ మధ్య సమతుల్యత సాధించడంపై దృష్టి సారించినట్లు తెలిపింది. NPC సోషల్ మీడియా వేదిక Xలో చేసిన పోస్టుల్లో, ఇంధన వినియోగాన్ని కేవలం తగ్గించడమే కాకుండా, ఉత్పత్తి, పంపిణీ వ్యవస్థలను ఆధునీకరించడం ద్వారా తక్కువ కార్బన్ ఆర్థిక వ్యవస్థ వైపు అడుగులు వేస్తున్నట్లు పేర్కొంది. ఇందులో భాగంగా కార్బన్ క్యాప్చర్ అండ్ స్టోరేజ్ సాంకేతికతలను విస్తరించడం, పునరుత్పాదక ఇంధన మౌలిక సదుపాయాలను పెంచడం, తక్కువ కార్బన్ ఉద్గారాల ఇంధనాల వినియోగాన్ని ప్రోత్సహించడం వంటి చర్యలు చేపడుతున్నారు.

విద్యుత్ రవాణాకు ప్రాధాన్యం

పట్టణ ప్రాంతాల్లో కాలుష్యాన్ని తగ్గించేందుకు ఖతార్ రవాణా వ్యవస్థను వేగంగా విద్యుదీకరిస్తోంది. ప్రజా రవాణాలో ఎలక్ట్రిక్ వాహనాల వినియోగాన్ని పెంచడం ద్వారా మరింత పరిశుభ్రమైన, పర్యావరణహిత రవాణా వ్యవస్థను అభివృద్ధి చేయాలని లక్ష్యంగా పెట్టుకుంది. నీటి వనరుల పరిరక్షణలో భాగంగా భూగర్భ జలాల వినియోగాన్ని 70 శాతం వరకు తగ్గించాలనే లక్ష్యాన్ని ఖతార్ నిర్దేశించుకుంది. ఇందుకోసం తక్కువ శక్తి వినియోగంతో పనిచేసే, పర్యావరణానికి అనుకూలమైన రివర్స్ ఆస్మోసిస్ డీశాలినేషన్ సాంకేతికతపై ఆధారపడనుంది.

శాతం సంరక్షిత ప్రాంతాలు

ఖతార్ సహజ వనరులు, జీవవైవిధ్య పరిరక్షణకు కూడా ప్రాధాన్యం ఇస్తోంది. దేశ మొత్తం భూభాగంలో 30 శాతం, సముద్ర ప్రాంతాల్లో కూడా 30 శాతం భాగాన్ని సంరక్షిత సహజ ప్రాంతాలుగా ప్రకటించే దిశగా చర్యలు కొనసాగుతున్నాయి. అదే సమయంలో దెబ్బతిన్న పర్యావరణ వ్యవస్థల్లో 30 శాతం పునరుద్ధరణ కోసం ప్రత్యేక కార్యక్రమాలు చేపడుతున్నారు. పట్టణీకరణ, పారిశ్రామిక అభివృద్ధి కొనసాగుతున్నప్పటికీ కీలక జీవవైవిధ్యాన్ని కాపాడడమే ఈ చర్యల ప్రధాన ఉద్దేశమని అధికారులు పేర్కొన్నారు.

కాలుష్య నియంత్రణకు సర్క్యులర్

పారిశ్రామిక కాలుష్యాన్ని తగ్గించేందుకు ఖతార్ ప్రధాన వాణిజ్య, పారిశ్రామిక రంగాల్లో సర్క్యులర్ ఎకానమీ విధానాలను అమలు చేయనుంది. వ్యర్థాల ఉత్పత్తిని తగ్గించడం, పరిశ్రమల్లో రీసైక్లింగ్ సామర్థ్యాన్ని పెంచడం, సంస్థలు మరియు ప్రజల్లో స్థిరమైన వినియోగ అలవాట్లను ప్రోత్సహించడం ద్వారా పర్యావరణంపై ఒత్తిడిని తగ్గించాలని లక్ష్యంగా పెట్టుకుంది. భవిష్యత్ తరాల అవసరాలను దృష్టిలో ఉంచుకుని సహజ పర్యావరణ వ్యవస్థలను పరిరక్షిస్తూ, అదే సమయంలో దీర్ఘకాలిక పారిశ్రామిక, ఆర్థికాభివృద్ధిని కొనసాగించే స్థిరమైన, సుస్థిర ఆర్థిక వ్యవస్థను నిర్మించడమే ఖతార్ లక్ష్యమని నేషనల్ ప్లానింగ్ కౌన్సిల్ వెల్లడించింది.