దుబాయ్: ఒడిశా ముఖ్యమంత్రి మోహన్ చరణ్ మాఝీ దుబాయ్‌లోని హోటల్ అనంతరాలో వన్ డిస్ట్రిక్ట్ వన్ ప్రొడక్ట్ (ODOP) ఒడిశా ప్రదర్శనను ప్రారంభించారు. ఒడిశా రాష్ట్రంలోని విభిన్న సంప్రదాయ కళలు, హస్తకళలు, చేనేత వస్త్రాలు, వ్యవసాయ ఉత్పత్తులు, ఆహార సంప్రదాయాలను అంతర్జాతీయ వేదికపై ప్రదర్శించడమే ఈ కార్యక్రమం ప్రధాన ఉద్దేశం.

ఈ ప్రదర్శనలో ఒడిశాలోని వివిధ జిల్లాల ప్రత్యేకతను ప్రతిబింబించే అనేక ఉత్పత్తులను ప్రదర్శిస్తున్నారు. కటక్‌కు ప్రసిద్ధి చెందిన సున్నితమైన సిల్వర్ ఫిలిగ్రీ, పూరీకి చెందిన రంగురంగుల పట్టచిత్ర, సంబల్‌పూర్‌ ప్రత్యేకత అయిన సంబల్పురి చేనేత వస్త్రాలు, కేంద్రపాడా గోల్డెన్ గ్రాస్ ఉత్పత్తులు, రాయగడకు చెందిన డోంగ్రియా షాల్స్, కొరాపుట్ కాఫీ వంటి ఉత్పత్తులు ప్రదర్శనలో ప్రత్యేక ఆకర్షణగా నిలిచాయి.

ఒడిశా వ్యవసాయ, ఆహార వారసత్వానికి కూడా ఈ ప్రదర్శన ప్రాధాన్యం కల్పించింది. జీడిపప్పు, పసుపు, తేనె, చింతపండు వంటి వ్యవసాయ ఉత్పత్తులతో పాటు చిరుధాన్యాలతో తయారు చేసిన ఆహార పదార్థాలు, రాష్ట్రానికి ప్రసిద్ధి చెందిన రసగుల్లా, ఛేనా పోడా వంటి సంప్రదాయ వంటకాలను కూడా ప్రదర్శిస్తున్నారు.

ఈ ప్రదర్శన ద్వారా ఒడిశా కళాకారులు, రైతులు, ఉత్పత్తిదారులు, స్థానిక వ్యాపార సంస్థలకు అంతర్జాతీయ మార్కెట్లలో విస్తృత అవకాశాలు కల్పించడమే లక్ష్యంగా పెట్టుకున్నారు. రాష్ట్రానికి చెందిన ప్రత్యేక ఉత్పత్తులు, సంప్రదాయ నైపుణ్యాలు ప్రపంచ వినియోగదారులకు చేరువయ్యేలా ఈ కార్యక్రమం దోహదపడుతుందని అధికారులు భావిస్తున్నారు.

ఒడిశా సాంస్కృతిక వారసత్వం, హస్తకళా నైపుణ్యం, పారిశ్రామిక స్ఫూర్తిని ప్రపంచానికి పరిచయం చేస్తున్న ఈ ప్రదర్శన ‘వోకల్ ఫర్ లోకల్’, ‘మేక్ ఇన్ ఇండియా’ లక్ష్యాలకు మరింత ఊతమిస్తోంది. స్థానిక ఉత్పత్తులకు అంతర్జాతీయ గుర్తింపు, కొత్త మార్కెట్లు కల్పించే దిశగా ఈ ప్రదర్శన కీలక అడుగుగా నిలుస్తోంది.