మెగాస్టార్ చిరంజీవి, దర్శకుడు బాబీ కొల్లి కాంబినేషన్‌లో తెరకెక్కుతున్న ‘కాకా’ సినిమాపై భారీ అంచనాలు నెలకొన్నాయి. గతంలో వీరిద్దరి కలయికలో వచ్చిన ‘వాల్తేరు వీరయ్య’ మంచి విజయాన్ని అందుకోవడంతో కొత్త సినిమాపై అభిమానుల్లో ఆసక్తి పెరిగింది. ఈ నేపథ్యంలో చిరంజీవి స్వయంగా తన పాత్రకు సంబంధించిన కొన్ని ఆసక్తికరమైన విషయాలను వెల్లడించినట్లు తెలుస్తోంది.

‘సత్యం’గా కనిపించే చిరంజీవి
ఇటీవల ఓ సినిమా వేడుకకు హాజరైన చిరంజీవి ‘కాకా’లో తన పాత్ర గురించి కొన్ని హింట్స్ ఇచ్చారు. ఈ సినిమాలో ఆయన ‘కదిరి కాళిదాస్’ అలియాస్ ‘సత్యం’ అనే రెండు విభిన్న కోణాలు ఉన్న పాత్రలో కనిపించనున్నట్లు సమాచారం. పైకి చూస్తే ఆక్వా ఫ్యాక్టరీలో సూపర్‌వైజర్‌గా పనిచేసే సాధారణ వ్యక్తిగా ‘సత్యం’ పాత్ర కనిపిస్తుందని తెలుస్తోంది. అయితే అతడి అసలు నేపథ్యం మాత్రం పూర్తిగా భిన్నంగా ఉంటుందని సమాచారం.

అండర్‌వాల్డ్‌ను శాసించే కదిరి కాళిదాస్
‘సత్యం’ పాత్రకు మరో శక్తిమంతమైన కోణం ‘కదిరి కాళిదాస్’. తెరవెనుక అండర్‌వాల్డ్ వ్యవహారాలను శాసించే వ్యక్తిగా ఈ పాత్రను డిజైన్ చేసినట్లు తెలుస్తోంది. దీంతో ఒకే పాత్రలో చిరంజీవి రెండు విభిన్న షేడ్స్‌లో కనిపించనుండటం సినిమాకు ప్రత్యేక ఆకర్షణగా మారనుంది.

తండ్రీకూతుళ్ల మధ్య ఎమోషనల్ కథ
‘కాకా’లో యాక్షన్ అంశాలతో పాటు తండ్రీకూతుళ్ల అనుబంధానికి ప్రాధాన్యత ఉంటుందని చిత్ర వర్గాల సమాచారం. చిరంజీవి కూతురిగా మలయాళ నటి అనశ్వర రాజన్ నటిస్తున్నారు. ఆమె ‘అమ్ములు’ అనే పాత్రలో మెడిసిన్ విద్యార్థినిగా కనిపించనున్నారు. తండ్రీకూతుళ్ల మధ్య వచ్చే భావోద్వేగ సన్నివేశాలు కథలో కీలకంగా ఉండనున్నట్లు తెలుస్తోంది. చిరంజీవి, అనశ్వర రాజన్ మధ్య సన్నివేశాలు సినిమాకు ప్రధాన ఆకర్షణగా నిలవనున్నాయని చిత్ర బృందం భావిస్తోంది.

సంక్రాంతి బరిలో ‘కాకా’
కేవీఎన్ ప్రొడక్షన్స్ భారీ బడ్జెట్‌తో నిర్మిస్తున్న ఈ సినిమా షూటింగ్ ప్రస్తుతం కొనసాగుతోంది. చిత్రాన్ని 2027 సంక్రాంతి సందర్భంగా జనవరి 13న ప్రపంచవ్యాప్తంగా విడుదల చేసేందుకు మేకర్స్ సన్నాహాలు చేస్తున్నట్లు సమాచారం. మరోవైపు సినిమా నుంచి ఫస్ట్ సింగిల్‌కు సంబంధించిన అప్‌డేట్ త్వరలోనే వచ్చే అవకాశం ఉందని తెలుస్తోంది. దీంతో చిరంజీవి అభిమానులు ‘కాకా’ నుంచి రాబోయే అప్‌డేట్స్ కోసం ఆసక్తిగా ఎదురుచూస్తున్నారు.