అబుదాబి: యూఏఈ జాతీయ రైల్వే నెట్‌వర్క్‌ను అభివృద్ధి చేసి నిర్వహిస్తున్న ఎతిహాద్ రైల్, AD Ports Group భాగస్వామ్యంతో ఫుజైరా టెర్మినల్స్‌ను అబుదాబిలోని ఇండస్ట్రియల్ సిటీ ఆఫ్ అబుదాబి (ICAD)తో అనుసంధానించే ప్రత్యేక సరుకు రవాణా రైలు సేవలను ప్రారంభించింది.

గల్ఫ్ ఆఫ్ ఒమాన్ తీరంలోని ఫుజైరా పోర్టును అబుదాబి పారిశ్రామిక ప్రాంతంతో నేరుగా అనుసంధానించే ఈ సేవ ద్వారా సముద్ర మార్గంలో ఫుజైరాకు చేరే సరుకును సుమారు 200 కిలోమీటర్ల దూరంలోని ICADకు రైలు ద్వారా తరలించవచ్చు.

కస్టమ్స్ సేవలతో మరింత సులభతరం

ICADలో కస్టమ్స్ క్లియరెన్స్, తనిఖీలు, సరుకు విడుదలకు ప్రత్యేక సదుపాయాలను అందుబాటులోకి తీసుకువచ్చారు. దీంతో ఫుజైరా టెర్మినల్స్‌కు చేరే కంటైనర్లను నేరుగా ICADకు రైలు ద్వారా తరలించి అక్కడే తనిఖీలు, కస్టమ్స్ క్లియరెన్స్, సరుకు విడుదల ప్రక్రియలను పూర్తి చేయవచ్చు.

ICADకు అంతర్జాతీయ లాజిస్టిక్స్ లొకేషన్‌గా గుర్తింపు కల్పిస్తూ “AECAD” అనే UN LOCODEను కేటాయించడం ఈ సేవ ప్రారంభంలో కీలక మైలురాయిగా నిలిచింది. దీంతో షిప్పింగ్ కంపెనీలు, ఫ్రైట్ ఫార్వార్డర్లు, సరుకు యజమానులు ICADను నేరుగా తమ సరుకు గమ్యస్థానం, క్లియరెన్స్ పాయింట్‌గా బుక్ చేసుకునే అవకాశం లభించింది.

వారానికి మూడు సార్లు రైలు సేవలు

ఈ ప్రత్యేక ఎతిహాద్ రైల్ సరుకు రవాణా సేవ వారానికి మూడు సార్లు నడుస్తుంది. అబుదాబిలోని దిగుమతిదారులు, ఎగుమతిదారులు, తయారీ సంస్థలు, డిస్ట్రిబ్యూటర్లు, లాజిస్టిక్స్ కంపెనీలకు ఇది ఉపయోగకరంగా ఉండనుంది.

గిడ్డంగులు, తయారీ కేంద్రాలు, తుది మార్కెట్లకు సరుకును మరింత చేరువగా అందించడంతో పాటు రోడ్డు రద్దీని తగ్గించడం, భారీ పరిమాణంలో సరుకు రవాణాను సులభతరం చేయడం, కార్బన్ ఉద్గారాలను తగ్గించడం వంటి ప్రయోజనాలు ఈ రైలు సేవ ద్వారా కలగనున్నాయి.

లాజిస్టిక్స్ వ్యవస్థకు మరింత బలం

ఎతిహాద్ రైల్ ఫ్రైట్ సీఈఓ ఒమర్ అల్‌సెబేయి మాట్లాడుతూ, ఫుజైరా–ICAD రైలు సేవ యూఏఈ జాతీయ రైల్వే నెట్‌వర్క్ సామర్థ్యాన్ని మరింత విస్తరించే కీలక అడుగని తెలిపారు. రైలు కనెక్టివిటీతో పాటు కస్టమ్స్ ఆధారిత ఇన్‌ల్యాండ్ కార్గో సదుపాయాలను కలపడం ద్వారా సరుకు రవాణా ప్రక్రియలను సులభతరం చేస్తున్నామని పేర్కొన్నారు.

AD Ports Group పోర్ట్స్ క్లస్టర్ సీఈఓ సైఫ్ అల్ మజ్రూయి మాట్లాడుతూ, ఫుజైరా టెర్మినల్స్, యూఏఈ జాతీయ రైల్వే నెట్‌వర్క్, ICADను ఒకే సమగ్ర వ్యవస్థగా అనుసంధానించడం ద్వారా వ్యాపారాలకు మరింత సౌకర్యవంతమైన, నమ్మకమైన సరుకు రవాణా మార్గాన్ని అందిస్తున్నామని తెలిపారు.

ఈ భాగస్వామ్యం యూఏఈలోని పోర్టులు, పారిశ్రామిక ప్రాంతాలు, ఫ్రీ జోన్లు, లాజిస్టిక్స్ కేంద్రాల మధ్య అనుసంధానాన్ని మరింత బలోపేతం చేయడంతో పాటు దేశాన్ని గ్లోబల్ ట్రేడ్, లాజిస్టిక్స్ హబ్‌గా మరింత అభివృద్ధి చేయడంలో దోహదపడనుంది.