మనామా: సముద్రంలో డైవింగ్ చేసే సమయంలో ప్రమాదాలను నివారించేందుకు భద్రతా మార్గదర్శకాలను తప్పనిసరిగా పాటించాలని బహ్రెయిన్ కోస్ట్‌గార్డ్ సూచించింది. సముద్ర భద్రతపై ప్రజల్లో అవగాహన పెంచేందుకు తమ కార్యక్రమాలను కొనసాగిస్తున్నట్లు అంతర్గత వ్యవహారాల మంత్రిత్వ శాఖ తెలిపింది. డైవింగ్‌కు వెళ్లే ముందు అవసరమైన శిక్షణ, అర్హతలు పొందడంతో పాటు శారీరకంగా డైవింగ్‌కు తగిన స్థితిలో ఉన్నామని నిర్ధారించుకోవాలని కోస్ట్‌గార్డ్ సూచించింది.

డైవింగ్ ట్రిప్‌ను ముందుగానే ప్రణాళిక చేసుకోవాలని, వాతావరణ పరిస్థితులు, సముద్ర పరిస్థితులు, నీటి ప్రవాహాలను పరిశీలించాలని తెలిపింది. అలాగే డైవింగ్ చేసే ప్రదేశం, నీటిలోకి దిగే సమయం, తిరిగి వచ్చే అంచనా సమయం వంటి వివరాలను సంబంధిత కోస్ట్‌గార్డ్ స్టేషన్‌కు తెలియజేయాలని సూచించింది.

డైవింగ్‌కు ముందు ఉపయోగించే పరికరాలు, బ్రీతింగ్ రెగ్యులేటర్స్, కనెక్షన్లు, సిలిండర్లలో గాలి స్థాయిని పూర్తిగా తనిఖీ చేయాలని కోస్ట్‌గార్డ్ పేర్కొంది. డైవింగ్ పరికరాలను క్రమం తప్పకుండా నిర్వహణ చేయడం కూడా ఎంతో ముఖ్యమని తెలిపింది. నీటిలోకి దిగే ముందు డైవింగ్ భాగస్వాములతో కలిసి డైవింగ్ ప్రణాళికను మరోసారి సమీక్షించుకోవాలని, అత్యవసర పరిస్థితుల్లో ఉపయోగించే కమ్యూనికేషన్ సంకేతాలపై ముందుగానే అవగాహన కలిగి ఉండాలని సూచించింది. ఒంటరిగా డైవింగ్ చేయవద్దని కోస్ట్‌గార్డ్ స్పష్టం చేసింది. 

డైవింగ్ సమయంలో ఇతర సభ్యులతో నిరంతరం సంప్రదింపులు కొనసాగిస్తూ, వారి సమీపంలోనే ఉండాలని సూచించింది. అత్యవసర పరిస్థితుల్లో ఒకరికొకరు వెంటనే సహాయం అందించేందుకు ఇది ఉపయోగపడుతుందని తెలిపింది.
డైవింగ్ పూర్తయిన తర్వాత తగినంత నీరు తాగాలని, ఆరోగ్య పరిస్థితిని గమనిస్తూ ఉండాలని కోస్ట్‌గార్డ్ సూచించింది. తల తిరగడం ఎక్కువసేపు కొనసాగడం, శ్వాస తీసుకోవడంలో ఇబ్బంది లేదా ఇతర అసాధారణ లక్షణాలు కనిపిస్తే వెంటనే వైద్య సహాయం తీసుకోవాలని అధికారులు సూచించారు.