దుబాయ్: భారత్-యూఏఈ మధ్య వాణిజ్య, పెట్టుబడి సంబంధాలను మరింత బలోపేతం చేసే దిశగా కీలక చర్చలు జరిగాయి. దుబాయ్‌లో భారత కాన్సుల్ జనరల్ డాక్టర్ ఈ. విష్ణువర్ధన్ రెడ్డి, యూఏఈ విదేశీ వాణిజ్య శాఖ మంత్రి డాక్టర్ థానీ బిన్ అహ్మద్ అల్ జెయౌదీని మర్యాదపూర్వకంగా కలిశారు.

ఈ సమావేశంలో భారత్-యూఏఈ మధ్య వాణిజ్యం, పెట్టుబడులను మరింత విస్తరించేందుకు తీసుకోవాల్సిన చర్యలపై ఇరువురు చర్చించారు. ద్వైపాక్షిక ఆర్థిక సహకారాన్ని మరింత బలోపేతం చేయడం, ఇరు దేశాల మధ్య వ్యాపార భాగస్వామ్యాలను విస్తరించడం వంటి అంశాలు సమావేశంలో ప్రస్తావనకు వచ్చినట్లు తెలిపారు.

భారత్-యూఏఈ ఆర్థిక సహకారాన్ని బలోపేతం చేయడంలో నిరంతరం మద్దతు అందిస్తున్న మంత్రి డాక్టర్ థానీ బిన్ అహ్మద్ అల్ జెయౌదీకి డాక్టర్ ఈ. విష్ణువర్ధన్ రెడ్డి కృతజ్ఞతలు తెలిపారు.

ఇరు దేశాల మధ్య ఇప్పటికే ఉన్న బలమైన ఆర్థిక సంబంధాలను మరింత విస్తరించేందుకు వాణిజ్యం, పెట్టుబడులు, వ్యాపార భాగస్వామ్యాల పై నిరంతరంగా దృష్టి సారిస్తున్న నేపథ్యంలో ఈ సమావేశం ప్రాధాన్యత సంతరించుకుంది.