కువైట్: గడువు ముగిసిన, గుర్తింపు వివరాలు లేని ఆహార ఉత్పత్తులపై కువైట్ అధికారులు కొరడా ఝళిపించారు. అల్-అర్దియా ఇండస్ట్రియల్ ఏరియాలో నిర్వహించిన తనిఖీల్లో మొత్తం 40,660 కిలోల సురక్షితం కాని ఆహార పదార్థాలను అధికారులు స్వాధీనం చేసుకుని ధ్వంసం చేశారు. జనరల్ అథారిటీ ఫర్ ఫుడ్ అండ్ న్యూట్రిషన్ (GAFN) ఆధ్వర్యంలో ఈ తనిఖీలు చేపట్టారు. స్థానిక ఆహార వ్యాపార సంస్థలు ఆరోగ్య, ఆహార భద్రత నిబంధనలు పాటిస్తున్నాయా లేదా అన్నది పరిశీలించేందుకు తనిఖీలు నిర్వహించారు.

ఈ సందర్భంగా అధికారులు పలు ఉల్లంఘనలను గుర్తించారు. గడువు ముగిసిన, కల్తీ చేసిన ఆహార పదార్థాల విక్రయం, అపరిశుభ్రత, ఉద్యోగులకు అవసరమైన ఆరోగ్య ధ్రువపత్రాలు లేకపోవడం వంటి ఉల్లంఘనలు బయటపడ్డాయి. ప్రజారోగ్య పరిరక్షణ, వినియోగదారులకు సురక్షితమైన ఆహారం అందించడమే లక్ష్యంగా ఇలాంటి తనిఖీలను నిరంతరం కొనసాగిస్తామని కువైట్ ఫుడ్ అథారిటీ స్పష్టం చేసింది. ఆహార భద్రత నిబంధనలు ఉల్లంఘించే సంస్థలపై చర్యలు కొనసాగుతాయని పేర్కొంది.