కువైట్: కువైట్‌లోని అన్ని ప్రభుత్వ సంస్థలు తమ డిజిటల్ సేవలను ‘సహేల్ (Sahl)’ యూనిఫైడ్ గవర్నమెంట్ యాప్ ‌లోకి మార్చాలని ప్రభుత్వం ఆదేశించింది. ఈ ప్రక్రియను 6 నెలల్లో పూర్తి చేయాలని స్పష్టం చేసింది.

ప్రభుత్వ కార్యాలయాలకు వెళ్లాల్సిన అవసరం లేకుండా పౌరులు, నివాసితులు ప్రభుత్వ సేవలను ఆన్‌లైన్‌లో పొందేందుకు సహేల్ యాప్ ఇప్పటికే విస్తృతంగా ఉపయోగపడుతోంది. ఈ నేపథ్యంలో అన్ని ప్రభుత్వ సంస్థల సేవలను ఒకే డిజిటల్ ప్లాట్‌ఫామ్‌లోకి తీసుకురావాలని నిర్ణయించారు.

ఒకే యాప్‌లో ప్రభుత్వ సేవలు

సహేల్‌లో అన్ని ప్రభుత్వ సేవలను అందుబాటులో తీసుకురావడం ద్వారా వినియోగదారులకు ఒకే విధమైన డిజిటల్ అనుభవం అందించడంతో పాటు ప్రభుత్వ సంస్థల మధ్య ఎలక్ట్రానిక్ అనుసంధానం, డేటా సమన్వయం మరింత మెరుగుపడుతుందని అధికారులు తెలిపారు. దీంతో ప్రభుత్వ సేవల సామర్థ్యం పెరగడంతో పాటు ప్రభుత్వ వ్యయాన్ని తగ్గించేందుకు కూడా అవకాశం ఉంటుందని పేర్కొన్నారు.

పేపర్ లావాదేవీలకు ముగింపు

ఈ చర్యలో భాగంగా కాగిత ఆధారిత లావాదేవీలను క్రమంగా తొలగించి, వేగవంతమైన మరియు సమర్థవంతమైన డిజిటల్ ప్రభుత్వ వ్యవస్థ వైపు కువైట్‌ను తీసుకెళ్లాలని లక్ష్యంగా పెట్టుకున్నారు. ఇది కువైట్ విజన్ 2035 లక్ష్యాలకు అనుగుణంగా ఉంటుందని అధికారులు తెలిపారు.

సహేల్ యాప్‌లో ఇప్పటికే డిజిటల్ సర్వీస్ జర్నీలను ప్రవేశపెట్టడం ద్వారా అనేక ప్రభుత్వ ప్రక్రియలను సులభతరం చేసినట్లు తెలిపారు. దరఖాస్తులు, లావాదేవీల స్థితిని పౌరులు, నివాసితులు నేరుగా యాప్‌లోనే తెలుసుకునే అవకాశం కూడా ఉంది.

ఇకపై వివిధ ప్రభుత్వ సంస్థలకు చెందిన అనేక ప్లాట్‌ఫామ్‌లు, ఛానళ్లకు బదులుగా ఒకే సహేల్ డిజిటల్ అనుభవం ద్వారా ప్రభుత్వ సేవలను పొందేలా వ్యవస్థను మార్చనున్నారు. దీంతో ప్రభుత్వ కార్యాలయాల మధ్య తిరగాల్సిన అవసరం లేకుండానే అనేక లావాదేవీలను ఎలక్ట్రానిక్‌గా పూర్తి చేసుకోవచ్చని వెల్లడించారు.