మక్కా: సౌదీ అరేబియాలోని మక్కాలో సందర్శకులను వేధిస్తూ, అక్కడి ప్రజల్లో భయాందోళనకు కారణమైన వ్యక్తిని భద్రతా అధికారులు అరెస్ట్ చేశారు. అతడి ప్రవర్తనతో ప్రజలు ఆందోళనకు గురికావడంతో అధికారులు వెంటనే చర్యలు తీసుకున్నట్లు సౌదీ అధికారులు వెల్లడించారు. అయితే అరెస్ట్‌కు సంబంధించిన మరిన్ని వివరాలను అధికారులు వెల్లడించలేదు.

మహిళను వేధించిన వ్యక్తి అరెస్ట్

ఈ ఏడాది ఆగస్టులోనూ సౌదీ అరేబియాలో ఓ వ్యక్తిని పోలీసులు అరెస్ట్ చేశారు. ఓ మహిళను వేధిస్తూ, మరో వ్యక్తిపై దాడి చేస్తున్నట్లు కనిపించిన వీడియో సోషల్ మీడియాలో వెలుగులోకి రావడంతో అధికారులు చర్యలు తీసుకున్నారు. సౌదీ అంతర్గత వ్యవహారాల మంత్రిత్వ శాఖ ప్రకారం.. ప్రాథమిక దర్యాప్తులో ఆ వ్యక్తికి మానసిక ఆరోగ్య సమస్యలు ఉన్నట్లు గుర్తించారు. అతనిపై చట్టపరమైన చర్యలు ప్రారంభించినట్లు రియాద్ పోలీసులు తెలిపారు.

వేధింపులపై కఠిన చర్యలు

సౌదీ అరేబియాలో వేధింపులకు సంబంధించి కఠినమైన చట్టాలు అమల్లో ఉన్నాయి. యాంటి హర్రాస్మెంట్ లా ప్రకారం.. అనుమతి లేని లైంగిక వ్యాఖ్యలు, చర్యలు లేదా హావభావాలతో ఇతరులను వేధించడం నేరంగా పరిగణిస్తారు. డిజిటల్ లేదా ఆధునిక సాంకేతిక పరిజ్ఞానం ద్వారా జరిగే వేధింపులు కూడా ఈ చట్టం పరిధిలోకి వస్తాయి.

ఈ నేరానికి రెండేళ్ల వరకు జైలు శిక్ష, SAR100,000 వరకు జరిమానా విధించే అవకాశం ఉంది. తీవ్రమైన లేదా పునరావృత నేరాల విషయంలో శిక్షను ఐదేళ్ల వరకు జైలు, SAR300,000 వరకు జరిమానాగా పెంచవచ్చు.

2021లో ఆరుగురి అరెస్ట్

మహిళలను వేధించినట్లు ఆరోపణలు ఎదుర్కొన్న వారిపై సౌదీ అధికారులు గతంలోనూ చర్యలు తీసుకున్నారు. 2021లో రియాద్‌ను సందర్శించిన ఓ విదేశీ మహిళ వాహనాన్ని చుట్టుముట్టి, ఆమెను మాటలు మరియు హావభావాలతో వేధించినట్లు ఆరోపణలు రావడంతో ఆరుగురు యువకులను అరెస్ట్ చేశారు. 

సౌదీ అరేబియా 2018లో లైంగిక వేధింపులను నేరంగా ప్రకటించింది. బాధితులను రక్షించడం, ప్రజలు మరియు కార్యాలయాల్లో మరింత సురక్షితమైన వాతావరణాన్ని కల్పించడం ఈ చట్టం ప్రధాన ఉద్దేశంగా పేర్కొన్నది. తర్వాత చట్టంలో మరిన్ని కఠిన నిబంధనలు చేర్చారు. నేర తీవ్రత, దాని ప్రభావాన్ని బట్టి దోషిగా తేలిన వ్యక్తి శిక్షను స్థానిక పత్రికల్లో లేదా ఇతర తగిన మార్గాల్లో ప్రచురించాలని కోర్టులు ఆదేశించే అవకాశం కూడా ఉంది.