రియాద్‌: సౌదీ అరేబియాలో 2026 నేషనల్ గ్రీనింగ్ సీజన్‌ అక్టోబర్‌ 7న ప్రారంభం కానుంది. దేశవ్యాప్తంగా పచ్చదనాన్ని పెంచడం, ఎడారీకరణను అరికట్టడం, స్థానిక వాతావరణానికి అనువైన స్వదేశీ మొక్కలను పెంచడం, పర్యావరణ పరిరక్షణలో ప్రజల భాగస్వామ్యాన్ని పెంచడం ఈ కార్యక్రమం ప్రధాన లక్ష్యాలని అధికారులు తెలిపారు. సౌదీ విజన్ 2030 లక్ష్యాలకు అనుగుణంగా ఈ దేశవ్యాప్త కార్యక్రమాన్ని నిర్వహించనున్నారు. ప్రభుత్వ, ప్రైవేట్‌, లాభాపేక్షలేని సంస్థలతో పాటు పర్యావరణ స్వచ్ఛంద కార్యకలాపాలను ప్రోత్సహించనున్నారు.

గత రెండేళ్లలో నేషనల్‌ గ్రీనింగ్‌ ప్రోగ్రామ్‌ ద్వారా 51,000 హెక్టార్లకు పైగా భూమిని పునరుద్ధరించారు. వర్షపు నీటి సేకరణ చర్యలతో పాటు 40 స్థానిక మొక్కల జాతులకు చెందిన 109 టన్నుల విత్తనాలను నాటారు. 2026 సీజన్‌లో అదనంగా 60,000 హెక్టార్ల భూమిని పునరుద్ధరించడమే లక్ష్యంగా పెట్టుకున్నారు. ఈసారి 70 స్థానిక మొక్కల జాతులకు చెందిన 110 టన్నులకు పైగా విత్తనాలను వివిధ ప్రాంతాల్లో చల్లనున్నారు. విత్తనాలు వేగంగా మొలకెత్తేందుకు క్లౌడ్‌ సీడింగ్‌ కార్యక్రమాలతో సమన్వయం చేసుకుని చర్యలు చేపట్టనున్నారు.

దేశవ్యాప్తంగా పచ్చదనాన్ని విస్తరించే ఈ కార్యక్రమం ద్వారా 2030 నాటికి మొత్తం 350,000 హెక్టార్ల భూమిని పునరుద్ధరించాలనే లక్ష్యాన్ని సౌదీ అరేబియా నిర్దేశించుకుంది. 2026 నేషనల్‌ గ్రీనింగ్‌ సీజన్‌ ప్రారంభానికి ముందు కార్యక్రమానికి సంబంధించిన అధికారిక విజువల్‌ ఐడెంటిటీని కూడా నేషనల్‌ గ్రీనింగ్‌ ప్రోగ్రామ్‌ విడుదల చేసింది. దేశవ్యాప్తంగా కార్యక్రమానికి సంబంధించిన మీడియా, కమ్యూనికేషన్‌ ప్రచారాల్లో ఈ బ్రాండింగ్‌ను ఉపయోగించాలని సంబంధిత సంస్థలకు సూచించింది.