రియాద్: సౌదీ అరేబియాలో పండ్లు, కూరగాయల దిగుమతులకు సంబంధించి ప్రభుత్వం కొత్త నిబంధనలను తీసుకొచ్చింది. కొత్త దిగుమతి లైసెన్సింగ్ మార్గదర్శకాలను వాణిజ్య మంత్రి డాక్టర్ మాజిద్ అల్-ఖసాబీ ఆమోదించారు. ఈ నిబంధనలు 30 రోజుల తర్వాత అమల్లోకి రానున్నాయి. కొత్త మార్గదర్శకాల ప్రకారం, పండ్లు, కూరగాయల దిగుమతికి సంబంధించిన ఇంపోర్ట్ పర్మిట్ 15 రోజుల పాటు మాత్రమే చెల్లుబాటు అవుతుంది. పర్మిట్ జారీ చేసిన తేదీ నుంచి ఈ గడువు లెక్కిస్తారు.

రవాణాకు ముందే అనుమతి తప్పనిసరి
దిగుమతిదారులు సరుకు పోర్టుకు చేరుకోవడానికి కనీసం 24 గంటల ముందే ఇంపోర్ట్ పర్మిట్ పొందాలి. అనుమతి లభించే వరకు సరుకును రవాణా చేయకూడదు. ఇంపోర్ట్ పర్మిట్ లేకుండా సౌదీ పోర్టుకు చేరుకునే సరుకును తిరస్కరిస్తారు. దీనికి సంబంధించిన పూర్తి బాధ్యత దిగుమతిదారుపైనే ఉంటుంది.

లైసెన్స్, కమర్షియల్ రిజిస్ట్రేషన్ అవసరం
పండ్లు, కూరగాయలను దిగుమతి చేసుకునే సంస్థలు సౌదీ పర్యావరణ, నీరు, వ్యవసాయ మంత్రిత్వ శాఖ జారీ చేసే దిగుమతి లైసెన్స్‌ను కలిగి ఉండాలి. అలాగే వ్యాపార కార్యకలాపాలకు అనుగుణమైన కమర్షియల్ రిజిస్ట్రేషన్ తప్పనిసరిగా ఉండాలి. దిగుమతి చేసే ఉత్పత్తుల వివరాలు ఇన్వాయిస్‌లో స్పష్టంగా పేర్కొనాలి. ఇంపోర్ట్ పర్మిట్ దరఖాస్తులోని అన్ని తప్పనిసరి వివరాలను కూడా పూర్తి చేయాలి.

పురుగుమందుల అవశేషాలపై నిబంధనలు
సౌదీ ఫుడ్ అండ్ డ్రగ్ అథారిటీ ఆమోదించిన ప్రమాణాల ప్రకారం, దిగుమతి చేసే పండ్లు, కూరగాయల్లో పురుగుమందుల అవశేషాలు అనుమతించిన పరిమితులకు మించకూడదు. అలాగే సౌదీ వ్యవసాయ క్వారంటైన్ జాబితాలో పేర్కొన్న హానికర పురుగులు, కీటకాల నుంచి సరుకు పూర్తిగా విముక్తంగా ఉండాలి.

ఫైటోసానిటరీ సర్టిఫికెట్‌కు డిజిటల్ అవకాశం
దిగుమతిదారులు ఫైటోసానిటరీ సర్టిఫికెట్ కు ఎలక్ట్రానిక్ కాపీని సమర్పించవచ్చు. అందులో ధృవీకరణ కోసం QR కోడ్ లేదా వెరిఫికేషన్ లింక్ ఉండవచ్చు. దీనితో పాటు ఆరిజిన్ సర్టిఫికెట్, షిప్పింగ్ పత్రాలు,  కస్టమ్స్ సర్టిఫికెట్ వంటి అవసరమైన డాక్యుమెంట్లను సమర్పించాలి.

దరఖాస్తుల పరిశీలనకు 7 పని దినాలు
దిగుమతి అనుమతుల కోసం దరఖాస్తులను ‘నమా (Nama)’ ప్లాట్‌ఫామ్ ద్వారా సమర్పించాలి. ఒక్కో దరఖాస్తును ప్రాసెస్ చేయడానికి గరిష్టంగా ఏడు పని దినాల గడువును మార్గదర్శకాలు నిర్దేశించాయి. దరఖాస్తు తిరస్కరణకు గురైనట్లయితే, దరఖాస్తుదారుకు అప్పీల్ చేసుకునే అవకాశం ఉంటుంది. తిరస్కరణ సమాచారం అందిన తేదీ నుంచి 15 రోజుల్లోపు పర్యావరణ, నీరు, వ్యవసాయ మంత్రిత్వ శాఖకు అప్పీల్ దాఖలు చేయవచ్చు.

కొత్త నిబంధనలతో సౌదీ అరేబియాలో పండ్లు, కూరగాయల దిగుమతులపై ముందస్తు అనుమతులు, నాణ్యత ప్రమాణాలు, వ్యవసాయ క్వారంటైన్ నిబంధనలను మరింత కఠినంగా అమలు చేయనున్నారు.