టెలికాం రంగంలో ఒక మహా అంకానికి బీజం పడేలా కనిపిస్తోంది. ప్రైవేట్ టెలికాం రంగంలో దూసుకుపోతున్న ఐడియా, వొడాఫోన్ కలిసి ఒకే తాటిపైకి వచ్చేందుకు సిద్ధమవుతున్నట్లు తెలిసింది. ఇండియాలో టెలికామ్ సేవలందిస్తున్న కంపెనీల్లో 3వ స్థానంలో ఉన్న ఐడియా, వొడాఫోన్‌తో కలిసి అడుగేయాలని పావులు కదుపుతోంది. రిలయన్స్ జియో ప్రకటిస్తున్న డేటా ఆఫర్ల వల్ల ఇతర టెలికామ్ సంస్థలు భారీగా నష్టపోతున్నట్లు తెలిసింది. ఇందులో భాగంగానే నష్టనివారణ చర్యలకు కంపెనీలు సమాలోచన చేస్తున్నాయి. ఈ నేపథ్యంలోనే ఐడియా, వొడాఫోన్ కంపెనీలు విలీన బాట పట్టినట్లు సమాచారం. రెండు కంపెనీలను విలీనం చేసి... వినియోగదారులకు ఆకర్షణీయమైన ఆఫర్లను ప్రకటించాలని భావిస్తున్నట్లు తెలుస్తోంది.అయితే ఈ విలీన వార్తలను ఇరు కంపెనీల ఉన్నతాధికారులు పూర్తిగా తోసిపుచ్చారు. విలీనం జరుగుతున్నట్లు వస్తున్న కథనాలన్నీ అవాస్తవమని కొట్టిపారేశారు. అయితే అంతర్గతంగా మాత్రం చర్చలు జరుగుతున్నాయని బిజినెస్ ఛానెల్స్ కోడైకూస్తున్నాయి.