దుబాయ్: ఓ ట్యాక్సీలో మర్చిపోయిన హ్యాండ్‌బ్యాగ్.. దానిని నిజాయితీగా తిరిగి అప్పగించిన డ్రైవర్ వ్యవహారం ఓ భారతీయ వ్యాపారి కుటుంబం జీవితాన్నే మార్చేసింది. దుబాయ్‌లో ఎదురైన ఈ అనుభవంతో దక్షిణాఫ్రికాలోని తన ఆస్తులను విక్రయించి, యూఏఈకి తరలివచ్చినట్లు రిటైర్డ్ బ్రిగేడియర్ జనరల్, న్యాయ సలహాదారు ఆరిఫ్ బుషాఖర్ అల్ ఫలాసీ వెల్లడించారు. అరబ్‌కాస్ట్ పోడ్‌కాస్ట్‌లో ఆయన ఈ ఘటనను వివరించారు. దక్షిణాఫ్రికా నుంచి దుబాయ్‌కి సందర్శనకు వచ్చిన భారతీయ వ్యాపారి భార్య తన కుమార్తెతో కలిసి ఓ మాల్‌కు వెళ్లేందుకు ట్యాక్సీ ఎక్కారు. మాల్ వద్ద దిగిన తర్వాత తన హ్యాండ్‌బ్యాగ్‌ను ట్యాక్సీలోనే మర్చిపోయారు.

కొద్దిసేపటి తర్వాత బ్యాగ్ కనిపించడం లేదని గుర్తించిన వారు, ట్యాక్సీ తీసుకున్న హోటల్‌కు తిరిగి వెళ్లారు. అక్కడే అదే ట్యాక్సీ డ్రైవర్ కనిపించాడు. బ్యాగ్‌ను కారులో వదిలివెళ్లారని డ్రైవర్ వారికి చెప్పాడు.హోటళ్ల వద్ద ప్రయాణికులను ఎక్కించే ట్యాక్సీలు ప్రయాణికులను దించిన తర్వాత తిరిగి తమ ప్రారంభ ప్రాంతానికి చేరుకోవాలనే రోడ్స్ అండ్ ట్రాన్స్‌పోర్ట్ అథారిటీ (RTA) విధానం కారణంగా డ్రైవర్ అక్కడికి తిరిగి వచ్చినట్లు అల్ ఫలాసీ తెలిపారు.బ్యాగ్‌ను తెరిచి చూసిన ఆమెకు అందులోని వస్తువులన్నీ యథాతథంగా కనిపించాయి. దీంతో ఆమెకు దుబాయ్‌లోని భద్రత, ప్రజల నిజాయితీపై విశ్వాసం ఏర్పడింది.

తన స్వదేశంలో ఇంటికి భద్రతా వ్యవస్థలు, తాళాలు ఉన్నప్పటికీ దొంగతనం ఎదురైందని ఆమె తన భర్తతో చెప్పినట్లు అల్ ఫలాసీ తెలిపారు. అయితే దుబాయ్‌లో బ్యాగ్ పోయినా అందులోని వస్తువులన్నింటితో తిరిగి లభించిందని ఆమె పేర్కొన్నట్లు చెప్పారు.ఈ అనుభవంతో దుబాయ్‌లోనే ఉండాలని ఆమె భర్తను కోరారు. తొలుత ఇంత పెద్ద నిర్ణయం వెంటనే తీసుకోవడం సాధ్యం కాదని ఆయన చెప్పినప్పటికీ, ఆరు నెలల్లో మొత్తం ఆస్తులను సర్దుకుని దుబాయ్‌కు మారుతానని హామీ ఇచ్చారు.అనంతరం వ్యాపారి దక్షిణాఫ్రికాలోని తన ఆస్తులను విక్రయించి, తనకు చెందిన సంస్థలోని అత్యుత్తమ 10 మంది ఉద్యోగులను మేనేజర్లుగా ఎంపిక చేసుకుని వారితో కలిసి దుబాయ్‌కు తరలివచ్చినట్లు అల్ ఫలాసీ తెలిపారు.

ఒక సాధారణ ట్యాక్సీ డ్రైవర్ నిజాయితీ చూపిన తీరు ఒక కుటుంబం దుబాయ్‌పై అభిప్రాయాన్ని మార్చడమే కాకుండా, చివరకు వారి నివాసం, వ్యాపార కేంద్రాన్ని మార్చుకునేలా చేసిందని ఆయన పేర్కొన్నారు. ప్రజల రోజువారీ ప్రవర్తన కూడా ఒక దేశానికి భద్రత, విశ్వసనీయతపై మంచి అభిప్రాయాన్ని కల్పించే ‘సాఫ్ట్ పవర్’గా పనిచేస్తుందని అల్ ఫలాసీ వివరించారు.