హైదరాబాద్: తెలంగాణ రాష్ట్ర రోడ్డు రవాణా సంస్థ (TGSRTC) గుర్తింపు సంఘం ఎన్నికల్లో EU కూటమి విజయాన్ని సాధించినట్లు సమాచారం. ఎంప్లాయిస్ యూనియన్ (EU), తెలంగాణ మజ్దూర్ యూనియన్, నేషనల్ మజ్దూర్ యూనియన్ కలిసి ఏర్పాటు చేసిన కూటమి సుమారు 4,500 ఓట్ల భారీ మెజారిటీతో విజయం సాధించినట్లు తెలుస్తోంది. ఈ ఫలితంతో రాష్ట్రంలో ఆర్టీసీ ఉద్యోగులకు ప్రాతినిధ్యం వహించే అతిపెద్ద గుర్తింపు సంఘంగా EU కూటమి నిలవనుంది. ఈ ఎన్నికలను కార్మిక సంఘాలు ప్రతిష్ఠాత్మకంగా తీసుకోవడంతో పోటీ తీవ్రంగా సాగింది. ఉద్యోగుల సమస్యలు, వారి హక్కులు, వేతనాలు, ఇతర ప్రయోజనాల విషయంలో తమ సంఘాలకు మద్దతు కూడగట్టేందుకు వివిధ యూనియన్లు ప్రయత్నించాయి. ఈ నేపథ్యంలో EU కూటమికి లభించిన ఆధిక్యం ఆర్టీసీ కార్మిక సంఘాల రాజకీయాల్లో కీలక పరిణామంగా మారింది.

TWU కూటమికి ఎదురుదెబ్బ..ఈ నెల 17న తుది ఫలితాలు

మరోవైపు, కాంగ్రెస్ మద్దతు ఉన్నట్లు పేర్కొంటున్న TWU కూటమికి ఈ ఎన్నికల్లో ఎదురుదెబ్బ తగిలినట్లు సమాచారం. అధికార పార్టీ మద్దతుతో బరిలోకి దిగిన కూటమికి పోటీగా EU కూటమి గణనీయమైన ఆధిక్యాన్ని సాధించడం చర్చనీయాంశంగా మారింది. అయితే, బ్యాలెట్ ఓట్ల లెక్కింపు పూర్తయిన తర్వాతే తుది ఫలితాలపై స్పష్టత రానుంది. ఈ నెల 17న అధికారికంగా తుది ఫలితాలను ప్రకటించనున్నట్లు సమాచారం.తుది ఫలితాల్లో కూడా ఇదే ఆధిక్యం కొనసాగితే, ఆర్టీసీ ఉద్యోగుల తరఫున యాజమాన్యంతో చర్చలు జరపడం, కార్మిక సమస్యలను ప్రభుత్వం దృష్టికి తీసుకెళ్లడం వంటి అంశాల్లో EU కూటమికి కీలక పాత్ర లభించనుంది. ఉద్యోగుల సంక్షేమం, పెండింగ్ సమస్యల పరిష్కారం, వేతనాలు, పని పరిస్థితుల మెరుగుదల వంటి అంశాలపై కొత్త గుర్తింపు సంఘం ఎలాంటి కార్యాచరణ చేపడుతుందన్నది ఇప్పుడు ఆసక్తికరంగా మారింది.