రియాద్: సౌదీ అరేబియాలో పురుషుల బార్బర్ షాపుల నిర్వహణకు సంబంధించి మున్సిపాలిటీలు, గృహనిర్మాణ మంత్రిత్వ శాఖ నిబంధనలను కఠినతరం చేసింది. బార్బర్లు తప్పనిసరిగా చెల్లుబాటు అయ్యే ఆరోగ్య ధ్రువపత్రాలు కలిగి ఉండాలని, వ్యక్తిగత పరిశుభ్రత పాటించాలని, సేవలు అందించే ముందు, ఆ సమయంలోనూ ఆరోగ్య ప్రమాణాలను అనుసరించాలని స్పష్టం చేసింది. లైసెన్స్ పొందిన బార్బర్ షాపు వెలుపల, ముఖ్యంగా వినియోగదారుల ఇళ్లకు వెళ్లి క్షవరం వంటి సేవలు అందించాలంటే ప్రత్యేక అనుమతి తీసుకోవడం తప్పనిసరి అని మంత్రిత్వ శాఖ వెల్లడించింది.

స్టెరిలైజ్ చేయాలి

బార్బర్ షాపుల్లో ఉపయోగించే పునర్వినియోగ పనిముట్లను ప్రతి వినియోగం తర్వాత శుభ్రం చేసి, క్రిమిసంహారక ప్రక్రియ నిర్వహించి, స్టెరిలైజ్ చేయాలని అధికారులు ఆదేశించారు. ఒక్కసారి మాత్రమే ఉపయోగించాల్సిన పనిముట్లను వాడిన వెంటనే పారవేయాలని స్పష్టం చేశారు. అలాగే షాపుల్లోని పరికరాలను క్రమం తప్పకుండా శుభ్రపరచడంతో పాటు, వినియోగదారులకు సేవలు అందించే ప్రాంతాలను పరిశుభ్రంగా ఉంచాలని సూచించారు.

ఆరోగ్యమే లక్ష్యం

వినియోగదారుల ఆరోగ్యాన్ని కాపాడటం, సేవల నాణ్యతను మెరుగుపరచడం, బార్బర్ షాపుల్లో ఆరోగ్యకరమైన పద్ధతులను ప్రోత్సహించడం ఈ నిబంధనల ప్రధాన ఉద్దేశమని మంత్రిత్వ శాఖ తెలిపింది. వ్యాపారాలను ప్రారంభించే పెట్టుబడిదారులు, యజమానులు ఆమోదించిన ప్రమాణాలకు అనుగుణంగా తమ సంస్థలను ఏర్పాటు చేసి నిర్వహించేందుకు ఈ నిబంధనలు స్పష్టమైన మార్గదర్శకాలను అందిస్తాయని పేర్కొంది.

అవగాహనకు ప్రాధాన్యం

కొత్త నిబంధనలపై వ్యాపార యజమానులకు అవగాహన కల్పించడం, వాటిని ఎలా అమలు చేయాలో వివరించడం కూడా తమ విధానంలో భాగమని మంత్రిత్వ శాఖ తెలిపింది. నిబంధనలు ఉల్లంఘించిన వారికి జరిమానాలు విధించే ముందు, వారు తమ బాధ్యతలను అర్థం చేసుకుని పాటించేలా ప్రోత్సహించడమే లక్ష్యమని వివరించింది. బార్బర్ షాపుల నిర్వాహకులు ఆరోగ్య ప్రమాణాలను రోజువారీ కార్యకలాపాల్లో భాగంగా అమలు చేయాలని, వినియోగదారులకు సురక్షితమైన, నాణ్యమైన సేవలు అందించాలని మంత్రిత్వ శాఖ స్పష్టం చేసింది.