అమరావతి: ఆంధ్రప్రదేశ్ ప్రభుత్వ ప్రధాన కార్యదర్శి (CS) జి. సాయిప్రసాద్ పదవీకాలాన్ని మరో ఆరు నెలల పాటు పొడిగిస్తూ కేంద్ర ప్రభుత్వం కీలక నిర్ణయం తీసుకుంది. ఈ మేరకు కేంద్ర సిబ్బంది, శిక్షణ వ్యవహారాల శాఖ (DoPT) గురువారం అధికారికంగా ఉత్తర్వులు జారీ చేసింది. తాజా నిర్ణయంతో ఆయన 2027 మే 31వ తేదీ వరకు ఏపీ సీఎస్‌గా కొనసాగనున్నారు.

రాష్ట్ర ప్రభుత్వ విజ్ఞప్తికి సూత్రప్రాయ ఆమోదం
రాష్ట్రంలో ప్రస్తుతం స్థానిక సంస్థల ఎన్నికల ప్రక్రియ జోరుగా సాగుతోంది. ఈ కీలక సమయంలో పరిపాలనా సౌలభ్యం, అనుభవం కలిగిన అధికారి మార్గదర్శకత్వం అవసరమని భావించిన చంద్రబాబు నాయకత్వంలోని రాష్ట్ర ప్రభుత్వం.. సీఎస్ పదవీకాలాన్ని పొడిగించాలని కేంద్రానికి విజ్ఞప్తి చేసింది. సెప్టెంబర్ 29న రాష్ట్ర ప్రభుత్వం పంపిన ప్రత్యేక ప్రతిపాదనలపై కేంద్ర ప్రభుత్వం సానుకూలంగా స్పందించింది.

నవంబర్ 30తో ముగియాల్సిన పదవీకాలం
1991 ఐఏఎస్ బ్యాచ్‌కు చెందిన జి. గోపీకృష్ణ సాయిప్రసాద్ ఈ ఏడాది (2026) నవంబర్ 30వ తేదీతో రిటైర్ కావాల్సి ఉంది. అయితే రాష్ట్ర పరిపాలనాపరమైన అవసరాలు మరియు స్థానిక పోరు నిర్వహణను దృష్టిలో ఉంచుకుని ఆయన సేవలను మరో 6 నెలల పాటు పొడిగించేందుకు ఆల్ ఇండియా సర్వీసెస్ నిబంధనల ప్రకారం కేంద్రం ప్రత్యేక మినహాయింపులు ఇచ్చింది.

వర్తింపజేసిన నిబంధనలు: డెత్-కమ్-రిటైర్మెంట్ బెనిఫిట్స్ రూల్స్ (1958)లోని రూల్ 16(1)కి సడలింపు ఇస్తూ, క్యాడర్ రూల్స్ (1960)లోని రూల్ 3 ఆధారంగా ఈ పొడిగింపును మంజూరు చేశారు.పొడిగింపు కాలమిది: డిసెంబర్ 1, 2026 నుండి మే 31, 2027 వరకు.

PMO, ఏపీ సీఎంఓలకు ఉత్తర్వుల ప్రతులు                                                                    కేంద్ర అండర్ సెక్రటరీ రాజేశ్ కుమార్ యాదవ్ సంతకంతో ఈ ఉత్తర్వులు వెలువడ్డాయి. ఈ ఆదేశాల ప్రతులను ప్రధానమంత్రి కార్యాలయం (PMO), ఆంధ్రప్రదేశ్ ముఖ్యమంత్రి కార్యాలయంతో (CMO) పాటు సంబంధిత ఇతర కేంద్ర, రాష్ట్ర శాఖలకు పంపించారు.

పరిపాలనలో స్థిరత్వం, ఎన్నికలకు సమర్థ నాయకత్వం
రాష్ట్రంలో అత్యంత కీలకమైన స్థానిక సంస్థల ఎన్నికల ప్రక్రియ పూర్తికాని ఈ సమయంలో అనుభవజ్ఞుడైన సీఎస్ కొనసాగడం పాలనలో స్థిరత్వానికి, కార్యనిర్వాహక యంత్రాంగం సమర్థవంతంగా పనిచేయడానికి ఎంతో దోహదపడుతుందని ప్రభుత్వం భావిస్తోంది.