రియాద్: సౌదీ అరేబియాలో 250 మందిలోపు అర్హత కలిగిన ఉద్యోగులున్న సంస్థలు తమ కార్మికులకు నిబంధనలకు అనుగుణమైన వసతి సౌకర్యాలు కల్పించడం తప్పనిసరి కానుంది. ఈ నిబంధనల తుది దశ అమలు ఫిబ్రవరి 1, 2027 నుంచి ప్రారంభం కానున్న నేపథ్యంలో, సంస్థలు ముందుగానే అవసరమైన అనుమతులు పొందాలని, నిబంధనలను పూర్తి చేయాలని నేషనల్ ప్రోగ్రామ్ ఫర్ డెవలపింగ్ గ్రూప్ హౌసింగ్ ఫర్ ఇండివిడ్యువల్స్ సూచించింది. మున్సిపాలిటీలు, గృహనిర్మాణ మంత్రిత్వ శాఖ నేతృత్వంలో పనిచేసే ఈ జాతీయ కార్యక్రమం సౌదీ అరేబియా వ్యాప్తంగా కార్మికుల సామూహిక వసతి గృహాలను నియంత్రిస్తుంది.  

సంస్థలకు గడువు

కొత్త నిబంధనలు అమల్లోకి రావడానికి ముందు ఉన్న సమయాన్ని గడువుగా పరిగణిస్తున్నట్లు కార్యక్రమ నిర్వాహకులు తెలిపారు. ఈ సమయంలో సంస్థలు అవసరమైన అనుమతులు, ఇతర ప్రక్రియలను పూర్తి చేసుకోవచ్చని పేర్కొన్నారు. నిబంధనలను పాటించేందుకు సంస్థలకు అధికారిక మార్గాల ద్వారా సహకారం అందిస్తామని వెల్లడించారు. కార్మికుల వసతి విషయంలో సంస్థలకు రెండు అధికారిక మార్గాలను సూచించారు.

- మొదటి మార్గం: సంస్థకు చెందిన భవనంలో సామూహిక వసతి ఏర్పాటు చేసి, ఆ భవనానికి సంబంధిత అనుమతి పొందాలి. ఇందుకోసం నిర్దేశించిన ఆరోగ్య, సాంకేతిక, భద్రతా ప్రమాణాలను పాటించడంతో పాటు, ఆమోదిత లైసెన్సింగ్ ప్లాట్‌ఫామ్‌ల ద్వారా దరఖాస్తు చేసుకోవాలి.
- రెండో మార్గం: ఇప్పటికే లైసెన్స్ పొందిన సామూహిక వసతి కేంద్రాలతో ఒప్పందాలు కుదుర్చుకోవాలి. దీంతో సంస్థలు సొంత వసతి గృహాలను నిర్వహించాల్సిన అవసరం లేకుండానే ఉద్యోగులకు నిబంధనలకు అనుగుణమైన నివాస సౌకర్యాలు కల్పించవచ్చు.
చట్టపరమైన చర్యలు

వసతి గృహాలకు అనుమతులు పొందడం లేదా లైసెన్స్ పొందిన వసతి కేంద్రాలతో ఒప్పందాలు చేసుకోవడం ఆలస్యం చేయకూడదని కార్యక్రమం సూచించింది. అనధికారికంగా నివాస భవనాలను కార్మికుల వసతి కోసం వినియోగించడాన్ని అరికట్టడంతో పాటు, ఆరోగ్య, సాంకేతిక, భద్రతా ప్రమాణాలను అమలు చేయడం ఈ నిబంధనల ఉద్దేశమని తెలిపింది. అర్హత కలిగిన సంస్థలు తమకు ఇచ్చిన గడువును పూర్తిగా వినియోగించుకుని, ఆమోదిత ప్లాట్‌ఫామ్‌ల ద్వారా ప్రక్రియలను పూర్తి చేయాలని లేదా లైసెన్స్ పొందిన వసతి కేంద్రాలను ఎంపిక చేసుకోవాలని సూచించింది. నిబంధనలు పాటించని సంస్థలు సంబంధిత మార్గదర్శకాలు, అమల్లో ఉన్న నిబంధనల ప్రకారం చట్టపరమైన పరిణామాలను ఎదుర్కోవాల్సి రావచ్చని హెచ్చరించింది.

కార్మికుల జీవన ప్రమాణాల మెరుగుదలకు చర్యలు

కార్మికులకు తగిన నివాస వసతులు కల్పించడం, ఆరోగ్య భద్రతా ప్రమాణాలను మెరుగుపరచడం, నగరాల పరిసరాలను క్రమబద్ధీకరించడం ఈ కార్యక్రమ లక్ష్యాలుగా ఉన్నాయి. అదే సమయంలో సంస్థలు తమ కార్యకలాపాలను కొనసాగించేందుకు వీలుగా వసతి నిబంధనలను అమలు చేయాలని అధికారులు పేర్కొన్నారు. ఈ జాతీయ కార్యక్రమంలో మున్సిపాలిటీలు, గృహనిర్మాణ మంత్రిత్వ శాఖతో పాటు పలు ఇతర మంత్రిత్వ శాఖలు, ప్రభుత్వ సంస్థలు కూడా భాగస్వాములుగా ఉన్నాయని వెల్లడించారు.