దోహా: ఖతార్‌లో నిర్వహించనున్న 7వ ఎడిషన్ బెలూన్ ఫెస్టివల్ వాయిదా పడింది. ఈ విషయాన్ని ఫెస్టివల్ నిర్వాహకులు సోషల్ మీడియా వేదికగా వెల్లడించారు. వాస్తవానికి ఈ వేడుకలు డిసెంబర్ 10–19 మధ్య జరగాల్సి ఉంది. అయితే, అనివార్య కారణాలతో కార్యక్రమాన్ని వాయిదా వేస్తున్నట్లు నిర్వాహకులు ప్రకటించారు. కొత్త తేదీలను ఇంకా ఖరారు చేయలేదని, అవి నిర్ధారణ కాగానే వెల్లడిస్తామని తెలిపారు.

విజిటర్స్ ఆశించే స్థాయిలో నాణ్యమైన కార్యక్రమాన్ని అందించాలనే ఉద్దేశంతోనే ఈ నిర్ణయం తీసుకున్నట్లు నిర్వాహకులు తమ ప్రకటనలో పేర్కొన్నారు. ఇదిలా ఉండగా, అంతర్జాతీయ బెలూన్ పైలట్లు ఇప్పటికే సమర్పించిన దరఖాస్తులన్నీ చెల్లుబాటులోనే ఉంటాయని స్పష్టం చేశారు. కొత్త తేదీలకు సంబంధించి దరఖాస్తుదారులకు నేరుగా సమాచారం అందిస్తామని తెలిపారు.