కువైట్: కువైట్ ఆరోగ్య మంత్రిత్వ శాఖలో పనిచేస్తున్న మొత్తం సిబ్బందిలో నర్సింగ్ విభాగానికి చెందిన వారు సుమారు 32 శాతం ఉన్నట్లు నర్సింగ్ సర్వీసెస్ విభాగం డైరెక్టర్ డాక్టర్ ఇమాన్ అల్ అవాధీ వెల్లడించారు. దేశవ్యాప్తంగా సమగ్ర వైద్య సేవలు నిరంతరాయంగా అందించడంలో నర్సింగ్ సిబ్బంది కీలక పాత్ర పోషిస్తున్నారని పేర్కొన్నారు.

‘సుస్థిర నర్సింగ్ సిబ్బంది కోసం వినూత్న వ్యూహాలు’ అనే అంశంపై నర్సింగ్ సర్వీసెస్ విభాగం నిర్వహించిన ప్రత్యేక వర్క్‌షాప్ ప్రారంభోత్సవంలో ఆరోగ్య మంత్రిత్వ శాఖ అండర్ సెక్రటరీ షేక్ డాక్టర్ సల్మాన్ ఖలీఫా అల్ సబా మాట్లాడారు. కువైట్‌లో నర్సింగ్ రంగంలో స్థానిక సిబ్బంది భాగస్వామ్యం క్రమంగా పెరుగుతోందని తెలిపారు. ఆరోగ్య వ్యవస్థను బలోపేతం చేయడంలో నర్సుల పాత్ర ఎంతో కీలకమని చెప్పారు.

వైద్య సేవల్లో నర్సులే తొలి రక్షణ కవచమని, రోగులతో నేరుగా ఎక్కువ సమయం సంబంధాలు కలిగి ఉండేది వారేనని ఆయన పేర్కొన్నారు. నర్సింగ్ సిబ్బందికి శిక్షణ, విద్య, నైపుణ్యాభివృద్ధికి ఆరోగ్య మంత్రిత్వ శాఖ నిరంతరం ప్రాధాన్యత ఇస్తోందన్నారు. నర్సుల నైపుణ్యాలు పెంచడం ద్వారా వైద్య సేవల నాణ్యత, సామర్థ్యం మెరుగుపడతాయని వివరించారు.

వివిధ దేశాలు, సంస్కృతులకు చెందిన నర్సింగ్ సిబ్బంది పనిచేస్తున్న నేపథ్యంలో నిరంతర శిక్షణ అవసరమని ఆయన అభిప్రాయపడ్డారు. వైద్య, అనుబంధ వృత్తుల నిర్వహణ, రోగుల హక్కులు, ఆరోగ్య సంస్థల నియంత్రణకు సంబంధించిన 2020 నాటి చట్టం నంబర్ 70 ద్వారా వైద్య సిబ్బందికి ప్రోత్సాహకాలు అందుతున్నాయని పేర్కొన్నారు. దీనివల్ల అర్హులైన యువత ఆరోగ్య రంగంలోకి రావడానికి అవకాశం కలుగుతుందన్నారు.

ఈ వర్క్‌షాప్‌లో నర్సింగ్ సిబ్బంది అవసరాలను అంచనా వేయడం, ప్రస్తుత సవాళ్లను పరిష్కరించడం, అంతర్జాతీయంగా అమలవుతున్న నూతన విధానాలను పరిశీలించడం, ప్రతిభావంతులైన సిబ్బంది నియామకం, నాయకత్వ సామర్థ్యాల పెంపుపై చర్చించారు.

2023లో ప్రారంభించిన ‘ఇన్నోవేషన్ ఇన్ నర్సింగ్ అవార్డు’ ద్వారా వినూత్న ఆలోచనలు, ఉత్తమ ప్రాజెక్టులు చేపట్టిన నర్సింగ్ సిబ్బందిని ప్రోత్సహిస్తున్నట్లు వెల్లడించారు. ఈ సందర్భంగా వైద్య వ్యవస్థ అభివృద్ధికి విశేష కృషి చేసిన పలువురు నర్సింగ్ సిబ్బందిని సత్కరించారు.