దోహా: అమెరికా, ఇరాన్ మధ్య నెలకొన్న సంక్షోభానికి దౌత్యపరమైన పరిష్కారం కనుగొని, ఈ ప్రాంతంలో ఉద్రిక్తతలు మరింత పెరగకుండా అడ్డుకునేందుకు ఖతార్ తన మధ్యవర్తిత్వ ప్రయత్నాలను ముమ్మరం చేసింది. ఇరు దేశాల మధ్య ప్రతిపాదనల మార్పిడి, విభేదాల పరిష్కారం కోసం నిరంతరం ప్రయత్నిస్తున్నట్లు ఖతార్ విదేశాంగ మంత్రిత్వ శాఖ అధికార ప్రతినిధి, ప్రధానమంత్రి సలహాదారు డాక్టర్ మాజిద్ బిన్ మొహమ్మద్ అల్ అన్సారీ తెలిపారు.

అమెరికా, ఇరాన్ మధ్య దూరాన్ని తగ్గించి, ఇరు పక్షాలను ఒక ఒప్పందానికి తీసుకురావడమే తమ లక్ష్యమని చెప్పారు. ఈ క్రమంలో ఖతార్ ప్రతినిధి బృందం సోమవారం టెహ్రాన్‌కు వెళ్లి, ఇరాన్ అధికారులతో సుమారు మూడు గంటల పాటు విస్తృతంగా చర్చలు జరిపినట్లు వెల్లడించారు. ఈ సమావేశంలో ఇరు దేశాల మధ్య ఉన్న విభేదాలను తగ్గించేందుకు పరిశీలనలో ఉన్న పలు ప్రతిపాదనలపై అభిప్రాయాలను పంచుకున్నట్లు తెలిపారు.

ఈ ప్రాంతంలో ఎలాంటి సైనిక ఉద్రిక్తతలు పెరిగినా మొత్తం గల్ఫ్ ప్రాంత భద్రతకు ముప్పు ఏర్పడుతుందని, చర్చల ప్రక్రియ మరింత సంక్లిష్టంగా మారుతుందని అల్ అన్సారీ హెచ్చరించారు. అయితే ఇరు పక్షాలు చర్చల ప్రక్రియ పట్ల నిబద్ధత చూపుతూ, ప్రతిపాదనలను పరిశీలిస్తుండటం ఒప్పందం కుదిరేందుకు ఆశలు కల్పిస్తోందన్నారు. మధ్యవర్తిగా ఉన్నంతకాలం ఆశ కోల్పోకూడదని, ఇరు దేశాల మధ్య సంప్రదింపుల్లో పరిణామాలు చోటుచేసుకుంటున్నప్పటికీ ప్రస్తుతానికి నిర్దిష్ట పురోగతి గురించి వెల్లడించలేమని చెప్పారు.

ఈ దౌత్య ప్రయత్నాలు గల్ఫ్ సహకార మండలి (GCC) దేశాలతో పూర్తి సమన్వయంతో కొనసాగుతున్నాయని తెలిపారు. ప్రాంతంలో ఉద్రిక్తతలు మరింత పెరగకుండా చూడటమే అన్ని గల్ఫ్ దేశాల ఉమ్మడి లక్ష్యమన్నారు. ముఖ్యంగా ఖతార్–పాకిస్థాన్ సంయుక్త మధ్యవర్తిత్వ ప్రయత్నాలకు తమ దేశం ప్రాధాన్యత ఇస్తోందని స్పష్టం చేశారు.

ప్రాంతీయ దేశాల మధ్య సహకారం అత్యంత ఉన్నత స్థాయిలో ఉందని, ప్రతిరోజూ ఆయా దేశాల నాయకులు పరస్పరం సంప్రదింపులు జరుపుతున్నారని పేర్కొన్నారు. సంక్షోభాన్ని దౌత్యపరంగా పరిష్కరించేందుకు, యుద్ధ వాతావరణం వల్ల ప్రజలకు ఎలాంటి ఇబ్బందులు కలగకుండా చూడటానికి అందరూ సమన్వయంతో పనిచేస్తున్నారని వివరించారు.

నౌకల రాకపోకలకు స్వేచ్ఛ తప్పనిసరి

ఖతార్‌కు చెందిన LNG నౌక 'అల్ మాయిదా'పై జరిగిన దాడిని అల్ అన్సారీ తీవ్రంగా ఖండించారు. హోర్ముజ్ జలసంధి, అరేబియా గల్ఫ్‌లో నౌకాయాన స్వేచ్ఛ విషయంలో ఎలాంటి రాజీ ఉండదని స్పష్టం చేశారు. ఖతార్ నౌకలతో పాటు గల్ఫ్ జలాల్లో ప్రయాణించే ఏ ఇతర నౌకపైనా దాడులు జరిగినా అది మొత్తం ప్రాంత భద్రతకు ముప్పేనని అన్నారు. ఇలాంటి ఘటనలు దౌత్య చర్చలపై కూడా ప్రతికూల ప్రభావం చూపుతాయని హెచ్చరించారు.

హౌతీల దాడులపై ఖండన

యెమెన్, హౌతీలకు సంబంధించిన పరిణామాలపై స్పందిస్తూ.. యెమెన్ చట్టబద్ధ ప్రభుత్వానికి, ఆ దేశ ప్రజల ఆకాంక్షలకు ఖతార్ మద్దతు కొనసాగుతుందని తెలిపారు. సౌదీ అరేబియాపై హౌతీలు జరిపిన దాడులను ఖతార్ స్పష్టంగా ఖండించిందని చెప్పారు. సౌదీకి తమ మద్దతు కొనసాగుతుందని, GCC ఆధ్వర్యంలో కుదిరిన ఒప్పందాల అమలుకు కట్టుబడి ఉన్నామని పేర్కొన్నారు.

రష్యా పర్యటనలో ప్రాంతీయ సంక్షోభంపై చర్చలు

ఖతార్ అమీర్ షేక్ తమీమ్ బిన్ హమద్ అల్ థానీ రష్యా పర్యటన, అధ్యక్షుడు వ్లాదిమిర్ పుతిన్‌తో సమావేశం గురించి కూడా అల్ అన్సారీ వివరించారు. ఇంధన రంగంతో సహా పలు కీలక రంగాల్లో ఖతార్, రష్యా మధ్య సహకారం కొనసాగుతోందన్నారు. గ్యాస్ ఎగుమతి దేశాల ఫోరం (GECF) 8వ శిఖరాగ్ర సమావేశంలో అమీర్ పాల్గొనడం ద్వారా ప్రపంచ ఇంధన భద్రతలో ఖతార్ పాత్ర, సమన్వయానికి ఉన్న ప్రాధాన్యత మరోసారి స్పష్టమైందని తెలిపారు.

పుతిన్‌తో జరిగిన చర్చల్లో ప్రాంతీయ సంక్షోభం, దాని పరిష్కారంలో రష్యా పోషించగల పాత్రపై చర్చించినట్లు చెప్పారు. ఐక్యరాజ్యసమితి భద్రతా మండలిలో శాశ్వత సభ్య దేశాలతో పాటు ఇతర అంతర్జాతీయ భాగస్వాములు కూడా సంక్షోభ పరిష్కారానికి సహకరించాల్సిన అవసరం ఉందన్నారు. ఇరాన్ అధ్యక్షుడితో అమీర్ సమావేశం కూడా ఇరు దేశాల మధ్య కొనసాగుతున్న ద్వైపాక్షిక సంప్రదింపుల్లో భాగమేనని వివరించారు.

ఇజ్రాయెల్ ఆరోపణలను ఖండించిన ఖతార్

ఇజ్రాయెల్ ఎన్నికల్లో ఖతార్ జోక్యం చేసుకుందని, ఫలితాలను ప్రభావితం చేసేందుకు ప్రయత్నించిందని వచ్చిన ఆరోపణలను అల్ అన్సారీ పూర్తిగా ఖండించారు. ఇజ్రాయెల్‌లో కొనసాగుతున్న అంతర్గత రాజకీయ విభేదాలకు ఖతార్‌ను బలిపశువుగా మార్చే ప్రయత్నాలను సహించబోమని స్పష్టం చేశారు. ఇతర దేశాల అంతర్గత రాజకీయ వ్యవహారాల్లోనూ తమ దేశాన్ని అనవసరంగా ఇరికించడాన్ని అంగీకరించబోమని తేల్చిచెప్పారు.