షార్జా: యూఏఈలో వాతావరణ పరిస్థితులు మారుతూ, పలు ప్రాంతాల్లో భారీ వర్షాలు కురుస్తున్న నేపథ్యంలో షార్జా అధికారులు వర్షాకాలాన్ని ఎదుర్కొనేందుకు ముందస్తు చర్యలు చేపట్టారు. వర్షపు నీరు రోడ్లపై నిలిచిపోకుండా, ప్రజలకు ఇబ్బందులు కలగకుండా ప్రత్యేక ఏర్పాట్లు చేశారు. ఈ చర్యల్లో భాగంగా షార్జా మున్సిపాలిటీ 1,100 మంది సిబ్బందిని రంగంలోకి దించింది. 

అలాగే 580 ట్యాంకర్ ట్రక్కులను సిద్ధం చేసింది. వర్షపు నీటిని తొలగించేందుకు ఐదు ప్రత్యేక వాహనాలను కూడా అందుబాటులో ఉంచింది. ఇవి గంటకు గరిష్ఠంగా 1,500 క్యూబిక్ మీటర్ల నీటిని పంపింగ్ చేయగలవని తెలిపారు. నగరంలోని డ్రైనేజీ వ్యవస్థను కూడా మెరుగుపరిచారు. ఇందులో భాగంగా 40,000 డ్రైనేజీ ఓపెనింగ్‌లను శుభ్రం చేశారు. వర్షపు నీటిని సేకరించేందుకు 70 ప్రత్యేక బేసిన్లను సిద్ధం చేశారు.

ఐదు ప్రధాన రహదారుల్లో కొత్త పంపింగ్ స్టేషన్లు

వర్షపు నీటి నిల్వ సమస్యను తగ్గించేందుకు ఐదు ప్రధాన రహదారుల్లో తొమ్మిది కొత్త పంపింగ్ స్టేషన్లను ఏర్పాటు చేశారు. ఒక్కో స్టేషన్ గంటకు 1,200 క్యూబిక్ మీటర్ల నీటిని బయటకు పంపగల సామర్థ్యం కలిగి ఉంది. ఈ ఏర్పాట్లు చేసిన రహదారుల్లో షేక్ ఖలీఫా బిన్ జాయెద్ స్ట్రీట్, షేక్ మొహమ్మద్ బిన్ జాయెద్ స్ట్రీట్, అల్ వహ్దా స్ట్రీట్, జమాల్ అబ్దుల్ నాసర్ స్ట్రీట్, అల్ దైద్ రోడ్ ఉన్నాయి. ఇక అల్ సయూహ్ ప్రాంతంలోని టన్నెల్‌ను 300mm పైప్‌లైన్ ద్వారా డ్రైనేజీ నెట్‌వర్క్‌కు అనుసంధానించారు. అల్ బులైదా టన్నెల్‌లో 200mm పంపింగ్ లైన్‌ను ఏర్పాటు చేసి నీటిని వేగంగా తొలగించేలా చర్యలు తీసుకున్నారు.

ఫిర్యాదులకు 24 గంటల హెల్ప్‌లైన్

వర్షాలకు సంబంధించిన సమస్యలు, నీరు నిలిచిపోవడం వంటి ఘటనలు ఎదురైతే వెంటనే అధికారులకు సమాచారం అందించాలని మున్సిపాలిటీ ప్రజలను కోరింది. ఇందుకోసం 24 గంటల పాటు అందుబాటులో ఉండే 993 కాల్ సెంటర్‌ను సంప్రదించాలని సూచించింది.

నవంబర్ 11న మలీహా, అల్ మదామ్, అల్ బదాయెర్, షౌకా ప్రాంతాల్లో భారీ వర్షాలు కురిశాయి. మరోవైపు అరేబియా సముద్రం నుంచి తేమతో కూడిన గాలులు, అల్పపీడన వ్యవస్థ ప్రభావంతో యూఏఈలోని పలు ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశం ఉందని వాతావరణ శాఖ తెలిపింది.  అదే సమయంలో గాలుల వేగం గంటకు 45 కిలోమీటర్ల వరకు చేరవచ్చని, దీంతో దుమ్ము, ఇసుక ఎగసిపడటంతో పాటు సముద్ర పరిస్థితులపై కూడా ప్రభావం పడవచ్చని నేషనల్ సెంటర్ ఆఫ్ మెటీరియాలజీ (NCM) వెల్లడించింది.