భక్తిరస చిత్రాలకు దర్శకేంద్రుడు కె.రాఘవేంద్రరావు పెట్టింది పేరు. తాజాగా అక్కినేని నాగార్జున, రాఘవేంద్రరావు కాంబినేషనల్‌ 'ఓం నమో వెంకటేశాయ' రూపుదిద్దుకుంటున్న సంగతి తెలిసిందే. వారిద్దరి కాంబినేషనల్‌లో వచ్చిన 'అన్నమయ్య', 'శ్రీరామదాసు', 'శిరిడి సాయి' చిత్రాలు ప్రేక్షకుల్ని ఎంతగానో ఆకట్టుకున్నాయి. సోమవారం(ఆగస్టు29) నాగార్జున పుట్టినరోజు సందర్భంగా ఈ చిత్రంలో ఆయన ఫస్ట్‌లుక్‌ను విడుదల చేశారు. ఈ చిత్రంలో నాగ్‌ హాథీరామ్‌ బాబాగా అద్భుతమైన పాత్ర పోషిస్తున్నారు. వెంకటేశ్వరస్వామిగా సౌరబ్‌జైన్‌ నటిస్తుండగా..భక్తురాలు కృష్ణమ్మగా అనుష్క నటిస్తోంది.ఈ చిత్ర నిర్మాణం శరవేగంగా జరుగుతోంది. జగపతిబాబు, ప్రగ్యాజైస్వాల్‌, విమలారామన్‌, రావు రమేశ్‌, వెన్నెల కిషోర్‌, ప్రభాకర్‌, రఘుబాబు తదితరులు ఈ చిత్రంలో నటిస్తున్నారు. ఎం.ఎం.కీరవాణి ఈ చిత్రానికి సంగీతం అందిస్తున్నారు. సాయికృపా ఎంటర్‌టైన్‌మెంట్‌ ప్రైవేట్‌ లిమిటెడ్‌ పతాకంపై ఈ చిత్రం రూపుదిద్దుకుంటుంది.