రియాద్: సౌదీ అరేబియాలో నివాస, కార్మిక, సరిహద్దు భద్రతా నిబంధనలను ఉల్లంఘించిన వారిపై అధికారులు భారీ స్థాయిలో తనిఖీలు నిర్వహించారు. నవంబర్ 5 నుంచి 11 వరకు వారం రోజుల్లో మొత్తం 11,952 మందిని అరెస్టు చేసినట్లు సౌదీ అంతర్గత వ్యవహారాల మంత్రిత్వ శాఖ శనివారం వెల్లడించింది. అరెస్టయిన వారిలో 6,163 మంది నివాస చట్టం (Residency Law), 3,225 మంది సరిహద్దు భద్రతా చట్టం (Border Security Law), 2,564 మంది కార్మిక చట్టం (Labor Law) ఉల్లంఘించినవారుగా గుర్తించారు.

దేశంలోకి అక్రమంగా ప్రవేశించేందుకు ప్రయత్నించిన 1,653 మందిని, సౌదీ నుంచి అక్రమంగా బయటకు వెళ్లేందుకు ప్రయత్నించిన 29 మందిని అధికారులు అదుపులోకి తీసుకున్నారు. ఇప్పటికే 11,418 మంది అక్రమ నివాసితులను దేశం నుంచి బహిష్కరించారు. మరో 22,451 మందిని ప్రయాణ పత్రాల కోసం వారి దౌత్య కార్యాలయాలకు పంపించారు. అలాగే 9,800 మందిని ప్రయాణ ఏర్పాట్లు పూర్తి చేసుకోవడానికి సంబంధిత విభాగాలకు అప్పగించారు.

అక్రమంగా నివసిస్తున్న వారికి రవాణా, ఆశ్రయం, ఉద్యోగాలు కల్పించిన 15 మందిని కూడా అరెస్టు చేశారు. ప్రస్తుతం చట్టపరమైన చర్యలు ఎదుర్కొంటున్న విదేశీయుల సంఖ్య 40,762గా ఉంది. వీరిలో 38,383 మంది పురుషులు, 2,379 మంది మహిళలు ఉన్నారు.

నిబంధనలు ఉల్లంఘిస్తే కఠిన శిక్షలు

అక్రమంగా వ్యక్తులను సౌదీలోకి తీసుకురావడం, దేశంలో రవాణా చేయడం, ఆశ్రయం కల్పించడం లేదా ఇతర సహాయాలు అందించడం నేరమని అంతర్గత వ్యవహారాల మంత్రిత్వ శాఖ హెచ్చరించింది. ఇలాంటి చర్యలకు పాల్పడితే గరిష్ఠంగా 15 ఏళ్ల జైలు శిక్షతో పాటు SR1 మిలియన్ వరకు జరిమానా విధిస్తారు. నేరాలకు ఉపయోగించిన వాహనాలు, ఆశ్రయం కల్పించిన ఇళ్లను కూడా స్వాధీనం చేసుకుంటారు.

అక్రమ నివాసితుల గురించి సమాచారం తెలిసిన వారు మక్కా, రియాద్, తూర్పు ప్రావిన్స్ ప్రాంతాల్లో 911 నంబర్‌కు, ఇతర ప్రాంతాల్లో 999 లేదా 996 నంబర్లకు ఫిర్యాదు చేయాలని అధికారులు ప్రజలను కోరారు.