కేంద్ర విదేశాంగశాఖా మంత్రి సుష్మాస్వరాజ్‌ ఇవాళ ఉదయం న్యూయార్క్‌ చేరుకున్నారు. ఐక్యరాజ్యసమితి జనరల్‌ అసెంబ్లీ 71 సమావేశాల్లో ప్రసంగించేందుకు ఆమె ఇక్కడికి చేరుకున్నారు. రేపు మధ్యాహ్నం ఆమె ప్రసంగించనున్నారు. భారత అంతర్గత అంశమైన కశ్మీర్‌పై పాక్‌ ప్రధాని చేసిన వ్యాఖ్యలకు ఆమె ఈ సమావేశాల్లో గట్టి సమాధానం ఇవ్వనున్నారని భావిస్తున్నారు. ఉగ్రవాదంతోపాటు, భద్రతా సమితి విస్తరణ, వాతావరణ మార్పులు, ప్రపంచ శాంతి వంటి అంశాలపై కూడా సుష్మాస్వరాజ్‌ దృష్టి పెట్టనున్నారు. ఈ విషయాన్ని కేంద్ర విదేశాంగశాఖ ప్రతినిధి వికాస్‌స్వరూప్‌ తెలిపారు. ఐక్యరాజ్యసమితి జనరల్‌ అసెంబ్లీలో సుష్మాస్వరాజ్‌ ఏం మాట్లాడుతుందోనని దేశం మొత్తం ఆసక్తిగా ఎదురు చూస్తోందని ఆయన పేర్కొన్నారు.సుష్మాస్వరాజ్‌ ప్రసంగపాఠం వివరాలను ఆయన బయటపెట్టలేదు.