చైనా శాస్త్రవేత్తలు రూపొందించిన అతిపెద్ద రేడియో టెలిస్కోప్‌ ఆదివారం నుండి తన కార్యకలాపాలను ప్రారంభించింది. వందల కోట్ల డాలర్ల వ్యయంతో అత్యంత ప్రతిష్టాత్మకంగా చేపట్టిన ఈ ప్రాజెక్టుతో పాటు ఈ నెలారంభంలో రోదసిలో రెండో అంతరిక్ష కేంద్రాన్ని ప్రారంభించిన విషయం తెలిసిందే. 500 మీటర్ల వ్యాసం కలిగిన ఈ రేడియో టెలిస్కోప్‌ను చైనా దక్షిణ ప్రాంతంలోని గిజౌ ప్రావిన్స్‌లో ఏర్పాటు చేశారు. ఈ టెలిస్కోప్‌ తారలు, రోదసిలో సంచరిస్తున్న ఇతర గ్రహాలు, గ్రహాంతర జీవుల నుండి వచ్చే సంకేతాలను సేకరించి పరిశోధకులకు అందచేస్తుంది. ఈ 500 మీటర్ల అపెర్చర్‌ స్ఫెరికల్‌ టెలిస్కోప్‌ (ఫాస్ట్‌) ప్రారంభ కార్యక్రమాన్ని వందలాది మంది ఖగోళ శాస్త్రవేత్తలు, ఔత్సాహికులు తిలకించారని సిన్హువా వార్తా సంస్థ వెల్లడించింది.దాదాపు 18 కోట్ల డాలర్ల వ్యయంతో చేపట్టిన ఈ ప్రాజెక్టు పూర్తయ్యేందుకు ఐదేళ్లు పట్టింది. ఇప్పటి వరకూ ప్రపంచంలో అతిపెద్ద రేడియోటెలిస్కోప్‌గా రికార్డుల కెక్కిన పోర్టారికోలోని అరెసిబో ప్రయోగశాలలో వున్న 300 మీటర్ల టెలిస్కోప్‌ రికార్డులను ఫాస్ట్‌ అధిగమించింది. భూమ్యాకర్షక రేడియో తరంగాలతో పాటు తారాలోకం, పాలపుంతల వంటి వాటి నుండి వచ్చే రేడియో తరంగాలను కూడా ఇది ఆకర్షిస్తుందని శాస్త్రవేత్తలను ఉటంకిస్తూ సిన్హువా వార్తా సంస్థ వెల్లడించింది.