ఒమన్‌: మినిస్ట్రీస్‌ అలాగే రాయల్‌ ఒమన్‌ పోలీస్‌ (ఆర్‌ఓపి) మధ్య మల్టీ ఏజెన్సీ సమావేశాలు చోటు చేసుకుంటున్నాయి. వలసదారుల నో అబ్జెక్షన్‌ సర్టిఫికెట్‌ (ఎన్‌ఓసి) విషయమై ఈ చర్చలు జరుగుతున్నట్లు మినిస్ట్రీ ఆఫ్‌ మేన్‌ పవర్‌ వర్గాలు వెల్లడించాయి. లేబర్‌ ఇమ్మిగ్రేషన్‌ని సులభతరం చేసేందుకు ఇప్పటికే పొరుగు దేశాలు ఈ చర్యలు చేపట్టిన దరిమిలా, ఒమన్‌ కూడా ఆ బాటలో నడిస్తే, దేశంలో లేబర్‌ మార్కెట్‌ మరింతగా విస్తృతమవుతుందని ఇండస్ట్రీ ప్రముఖులు అభిప్రాయపడుతున్నారు. మినిస్టర్‌ ఫర్‌ మేన్‌ పవర్‌ సలహాదారు సైద్‌ బిన్‌ నాజర్‌ అల్‌ సాది మాట్లాడుతూ 'ఎన్‌ఓసి ఆప్షన్‌ని రద్దు చేయాలనుకుంటున్నాం.. అది రద్దవుతుంది.. ప్రస్తుతం ఈ ప్రతిపాదనపై విస్తృత చర్చ జరుగుతోంది' అని చెప్పారు. ఒమన్‌లో జాబ్‌ చేంజెస్‌ కోసం వలసదారులు ఎన్‌ఓసి తప్పనిసరిగా చేయించాల్సి ఉంటుంది. లేని పక్షంలో రెండేళ్ళపాటు దేశంలోకి ప్రవేశించకుండా నిషేధాజ్ఞలు అమలవుతాయి. ఈ కారణంగా, లేబర్‌ మార్కెట్‌ ఇబ్బందికరమైన పరిస్థితుల్లోకి వెళుతోందని నిపుణులు అంచనా వేశారు.