వే గం అంటే వెంకటేష్‌దే. సినిమా ప్రారంభానికి ముందే ఫస్ట్‌లుక్‌ని విడుదల చేశారు. చిత్రీకరణ మొదలైన ఐదు వారాలకే టీజర్‌ని విడుదల చేయబోతున్నారు. మూడు నెలల్లోనే సినిమా చిత్రీకరణని పూర్తి చేసి ప్రేక్షకుల ముందుకు తీసుకురావాలన్న లక్ష్యంతో బరిలోకి దిగారు వెంకీ. ఆ లక్ష్యాన్ని అవలీలగా చేరుకొనేలా కనిపిస్తున్నారు. వెంకటేష్‌ కథానాయకుడిగా నటిస్తున్న 'గురు' శరవేగంగా చిత్రీకరణ జరుపుకొంటోంది. సుధ కొంగర దర్శకత్వం వహిస్తున్న ఈ చిత్రం హిందీలో విజయవంతమైన 'సాలా ఖడూస్‌'కి రీమేక్‌గా రూపొందుతున్న విషయం తెలిసిందే. ఇందులో వెంకటేష్‌ బాక్సింగ్‌ కోచ్‌గా కనిపిస్తారు.హిందీలో బాక్సర్‌గా నటించిన రితికాసింగ్‌ తెలుగులోనూ అదే పాత్రని పోషిస్తున్నారు. సెప్టెంబరు 19న 'గురు' చిత్రాన్ని ప్రారంభించారు. సంక్రాంతికి ప్రేక్షకుల ముందుకు తీసుకురాబోతున్నారు. ఇప్పటికే ఫస్ట్‌లుక్‌ని విడుదల చేశారు.దీపావళిని పురస్కరించుకొని ఈ నెల 30న టీజర్‌ని విడుదల చేయబోతున్నారు. ఈ చిత్రం కోసం వెంకీ తన లుక్‌ని పూర్తిగా మార్చుకొన్నారు. బరువు తగ్గడంతో పాటు కండలు పెంచి ప్రత్యేకంగా సన్నద్ధమయ్యారు.