మధ్య ఇటలీ ప్రాంతంలో బుధవారం తీవ్ర భూకంపం సంభవించింది. భూకంప లేఖినిపై తీవ్రత 6.0గా నమోదైనట్లు అమెరికా భూభౌతిక పరిశోధనా సంస్థ తెలిపింది. ప్రాణ నష్టంపై కచ్చితమైన సమాచారం లేదు. భారీ భూకంపానికి 2 గంటల ముందు 5.4 తీవ్రతతో భూప్రకంపనలు వచ్చాయి. రోమ్‌కు దక్షిణాన 150 కిలోమీటర్ల దూరంలో 10 కిలోమీటర్లలో లోతులో భూకంప కేంద్రం ఉన్నట్లు గుర్తించారు. దీని ప్రభావం మార్చీ ప్రాంతంలోని కాస్టిలాంజింలో సుల్‌నీరా పట్టణంపై తీవ్రంగా ఉంది. ఈ పట్టణంలో చాలా ఇళ్లు పాక్షింగా దెబ్బతిన్నట్లు సమాచారం. దీనికి సమీపంలోని విస్సో పట్టణంలో కొంత మంది గాయపడినట్లు అధికారులు పేర్కొన్నారు.ఒక పురాతన చర్చి ధ్వంసమైనట్లు సమాచారం. దీంతో పాఠశాలలకు సెలవు ప్రకటించారు. కొన్ని ప్రాంతాల్లో విద్యుత్తు సరఫరా నిలిచిపోయింది. ఈ ప్రాంతానికి వచ్చే రహదారులను అధికారులు మూసివేశారు.భూకంప సమాచారం అందిన వెంటనే ఇటలీ ప్రధాని మాట్టీయో రెన్జీ తన అధికారిక కార్యక్రమాలను రద్దు చేసుకుని సహాయక చర్యలపై సమీక్షించారు.