దేశానికి సినిమా హబ్‌గా హైదరాబాద్‌ నగరాన్ని మారుస్తామని తెలంగాణ సినిమాటోగ్రఫీ మంత్రి తలసాని శ్రీనివాస్‌ యాదవ్‌ అన్నారు. చారిత్రక ప్రదేశాల వద్ద సినిమా షూటింగ్‌ల కోసం ఏర్పాట్లు కల్పించేందుకు ప్రభుత్వం సిద్ధంగా ఉందన్నారు. సచివాలయంలోని తన కార్యాలయంలో ఆయన మీడియాతో మాట్లాడారు. ఉగాది నుంచి తెలంగాణ ప్రభుత్వం తొలిసారిగా సినిమా అవార్డులను అందచేయనుందని తెలిపారు. అవార్డుకు నంది పేరు మారిస్తే ఏ పేరు పెట్టాలన్న అంశాన్ని రమణాచారి నేతృత్వంలోని కమిటీ నిర్ణయిస్తుందన్నారు. అవార్డులకిచ్చే పారితోషికం, జాతీయ అవార్డుకు ఎవరి పేరు పెట్టాలో కమిటీయే నిర్ణయం తీసుకుంటుందన్నారు.

చిన్న సినిమాలు థియేటర్లు దొరక్క ఇబ్బందులు ఎదుర్కొంటున్నాయని.. ఈ పరిస్థితి నుంచి బయటపడేందుకు త్వరలో ఐదో ఆటకు అనుమతి ఇవ్వనున్నట్లు తెలిపారు. అబ్దుల్లాపూర్‌మెట్‌, కోహెడ ప్రాంతాల్లో చిత్రనగరిని నిర్మించేందుకు ప్రయత్నాలు చేస్తున్నామన్నారు.