ఫ్యామిలీ హీరో ట్యాగ్ ని తగిలించుకొని కొన్నాళ్ళు తన హవాని నడిపించిన జగపతి బాబు ప్రస్తుతం ప్రతినాయకుడి పాత్రలో నటిస్తూ దూసుకుపోతున్నాడు. లెజెండ్ సినిమాలో విలన్ గా నటించిన జగపతి బాబుకి ప్రస్తుతం కాల్షీట్స్ ఏ మాత్రం ఖాళీగా లేవు. మరి అంతగా బిజీ అయ్యాడు అప్పటి హీరో. కేవలం తెలుగు సినిమాలలోనే కాదు తమిళం, కన్నడ భాషలలోను జగపతి బాబు హవా నడుస్తోంది. ఇక ఇప్పుడు దర్శకేంద్రుడు కె.రాఘవేంద్రరావు తెరకెక్కిస్తోన్న భక్తి రస చిత్రంలోను జగపతి బాబు ఓ కామియో రోల్ పాత్ర పోషించనున్నట్టు వార్తలు వస్తున్నాయి. కృష్ణమ్మ భక్తురాలు అనుష్క పై మనసుపడే మహరాజు పాత్రలో జగపతి బాబు నటించనున్నాడని చెబుతున్నారు. మహారాజు పాత్రలో జగపతి బాబు చాలా గొప్పగా కనిపించనున్నాడని చెబుతున్నారు.

ఇప్పటికే జగపతి బాబు, అనుష్క లపై ఓ సాంగ్ ని కూడా చిత్రీకరించినట్టు చిత్ర యూనిట్ పేర్కొంది. హథీరాం బాబా జీవిత నేపథ్యంలో తెరకెక్కుతున్న ఓం నమో వెంకటేశాయ చిత్రంలో సౌరభ్‌ జైన్ వెంకటేశ్వర స్వామిగా కనిపించనుండగా.. విమలా రామన్, ప్రజ్ఞా జైస్వాల్‌ కీలక పాత్రల్లో నటిస్తున్నారు. ఈ చిత్రానికి కీరవాణి సంగీతం అందిస్తున్నారు. ఫిబ్రవరి 10న ఈ చిత్రాన్ని థియేటర్స్ లోకి తీసుకురావాలని యూనిట్ భావిస్తోంది.