ఒలింపిక్స్‌ పోటీల గురించి అందరికీ తెలుసు. నాలుగేళ్లకు ఒకసారి జరిగే ఈ పోటీల్లో ప్రపంచ దేశాల అథ్లెట్లు పాల్గొంటారు. వికలాంగుల కోసం పారాలింపిక్స్‌ ఒలింపిక్స్‌ నిర్వహిస్తారని తెలుసు. మరి శాంటా వింటర్‌ గేమ్స్‌ గురించి మీకు తెలుసా? క్రిస్మస్‌ అంటే మొదటగా గుర్తొచ్చేది శాంటాక్లాజ్‌. తెలుపు అంచులున్న ఎరుపు రంగు దుస్తులు ధరించి తెల్లటి గడ్డంతో శాంటా తాతయ్య వచ్చి బహుమతులిస్తాడని పిల్లలు ఎదురుచూస్తుంటారు. ఆ శాంటాక్లాజ్‌ల కోసం వరల్డ్‌ కప్‌ పోటీలు నిర్వహిస్తారు. వీటిని శాంటా వింటర్‌ గేమ్స్‌ అని కూడా పిలుస్తుంటారు. స్వీడన్‌లోని గల్లివర్‌ అనే పట్టణంలో 2003 నుంచి ఏటా ఈ పోటీలను నిర్వహిస్తారు.

ఇందులో భాగంగా గిఫ్ట్‌లను ప్యాక్‌ చేయడం, క్రిస్మస్‌ ట్రీని అందంగా అలంకరించడం, డ్యాన్స్‌ చేయడం, ధృవపు జింకలను తాడు ద్వారా నియంత్రించడం తదితర విభాగాల్లో పోటీలు నిర్వహిస్తారు. ఈ పోటీల్లో తలపడేందుకు చైనా, హాంకాంగ్‌, ఫ్రాన్స్‌, జర్మనీ, కొలంబియా తదితర దేశాల నుంచి శాంటాలు వస్తుంటారు. తాజాగా జరిగిన ఈ శాంటా ఒలింపిక్స్‌లో స్వీడన్‌ చెందిన శాంటాలు ప్రథమ స్థానంలో నిలిచారు