ఐడీటీఎస్‌ ద్వారా పరీక్ష..కొత్తగా స్మార్ట్‌ ట్రాక్‌లువచ్చే నెలనుంచి అందుబాటులోకి 

 డ్రైవింగ్‌ లైసెన్సు పొందడం ఇకపై అంత తేలికేం కాదు. ఇప్పటివరకు తూ తూమంత్రంగా నడిపినా వచ్చినా కూడా ఈజీగానే లైసెన్సు వచ్చేసేది. ఇకపై మాత్రం అలా కాదు. వాహనం నడిపేవారి సామర్థ్యాన్ని పూర్తిగా పరీక్షించే సాంకేతిక పరిజ్ఞానం రవాణా శాఖకు అందుబాటులోకి రానుంది. ‘ఇన్నోవేటివ్‌ డ్రైవింగ్‌ టెస్టింగ్‌ సిస్టం (ఐడీటీఎస్‌)’ పేరుతో రూపుదిద్దుకున్న ఈ పరిఙ్ఞానాన్ని తెలంగాణ రవాణా శాఖ వచ్చే నెలనుంచి రాష్ట్రంలోని వివిధ డ్రైవింగ్‌ ట్రాక్‌ల్లో ప్రవేశపెట్టనుంది. మూడు రోజుల క్రితం తెలంగాణ రవాణాశాఖ అధికారులు.. పుణే ఐడీటీఆర్‌ (ఇన్‌స్టిట్యూట్‌ ఆఫ్‌ డ్రైవింగ్‌ ట్నైనింగ్‌ అండ్‌ రీసెర్చ్‌)ను సందర్శించి వచ్చారు. ఈ విధానంలో డ్రైవింగ్‌ ట్రాక్‌లపై రెండు వైపులా సెన్సార్లను ఏర్పాటు చేస్తారు. డ్రైవర్‌ వాహనం నడుపుతున్నప్పుడు.. ఏ మాత్రం తేడా వచ్చినా ఈ సెన్సార్లు పసిగడతాయి. స్మార్ట్‌ ట్రాక్‌లుగా వ్యవహరిస్తారించే ఈ ట్రాక్‌లపై.. మొత్తం డ్రైవింగ్‌ ప్రక్రియను టూడీలో వీడియో కెమెరాల ద్వారా రికార్డు చేస్తారు. సెన్సార్లు, కెమెరాల ద్వారా వచ్చే సమాచారాన్ని క్రోడీకరించి సామర్ధ్యాన్ని బట్టి ఆటోమేటిక్‌గా మార్కులు పడతాయి. ఈ మార్కులను బట్టే డ్రైవింగ్‌ లైసెన్సు ఇవ్వాలో, వద్దో నిర్ణయిస్తారు.