'నాయకి' త్రిష సినీ రంగంలో అడుగుపెట్టి పదేళ్ల పైనే కావొస్తున్నా ఈ మిస్‌ చెన్నై కోసం అవకాశాలు వేచి చూస్తూనే ఉన్నాయి. ఇటీవల 'నాయకి', 'ధర్మయోగి' చిత్రాలతో ఆకట్టుకున్న త్రిష మరో అయిదు చిత్రాల్లో నటిస్తోంది. తాజాగా మరో కొత్త ప్రాజెక్ట్‌కు సంతకం చేసిందట. ముంబయి ఉగ్రదాడులపై తెరకెక్కుతున్న చిత్రంలో త్రిష నటించబోతోంది. ఈ సినిమాకి '1818' అనే టైటిల్‌ను ఖరారు చేశారు. మైండ్‌ డ్రామా పతాకంపై నిర్మించనున్న ఈ చిత్రాన్ని రిథున్‌ సాగర్‌ దర్శకత్వం వహించనున్నారు. ఈ సినిమాలో త్రిష ముఖ్య భూమిక పోషిస్తోంది. సుమన్‌, రాజేంద్ర ప్రసాద్‌, రమేశ్‌ తిలక్‌, మీరా ఘోషల్‌లు కీలక పాత్రలో నటించనున్నారు. తెలుగు, తమిళంలో ఈ సినిమాని విడుదల చేయడానికి చిత్రబృందం సన్నాహాలు చేస్తోంది. ఎస్‌ఎస్‌.థమన్‌ ఈ చిత్రానికి పాటలు సమకూరుస్తున్నారు.