సిరియన్ శరణార్ధుల కష్టాలు, కన్నీళ్లు అంతే లేకుండా పోతున్నది. స్వస్థలాలను వదిలి బతుకుజీవుడా అంటూ సురక్షిత ప్రాంతాలకు వలస వెళుతున్న వారికి సముద్రుడు, ధనిక దేశాలు కూడా అవరోధాలు సృష్టిస్తున్నాయి. సముద్రుడు నిలువునా ప్రాణాలు తీసేస్తుంటే.,. దేశాలు ఆశ్రయం ఇవ్వకుండా ఆకలి చావులకు గురి చేస్తున్నాయి. ఒక సిరియన్ శరణార్థుడు తన కుమార్తెను ఎత్తుకుని బతుకు కోసం సాగిస్తున్న అనంత యాత్రకు నిదర్శనంగా నిలుస్తున్నదీ చిత్రం. బతుకు తీపి తో సమానంగా కుమార్తె మీద ప్రేమ ఆ తండ్రిని వర్షాన్ని కూడా లెక్కచేయకుండా పరుగులు తీయిస్తున్నది. ఎక్కడ ఆగుతుందో తెలియని పరుగు పెడుతున్న ఆ తండ్రి లాంటి లక్షలాది మందిని ఆదుకుని అక్కున చేర్చుకోవలసిన బాధ్యత ప్రపంచ దేశాలపై ఉంది.