ఇటీవల కాలంలో తెలుగు చిత్రసీమ కథానాయకులు అడపాదడపా పాటలు పాడుతున్నారు. తనదైన నటనతో అభిమానులను సొంతం చేసుకున్న అగ్రకథానాయకుడు వెంకటేష్‌ కూడా ఇప్పుడు ఆ జాబితాలో చేరారు. ఆయన కీలక పాత్రలో నటిస్తున్న చిత్రం ‘గురు’. సుధ కొంగర దర్శకత్వం వహిస్తున్నారు. ఇప్పటికే చిత్రీకరణ పూర్తి చేసుకున్న ‘గురు’ ప్రస్తుతం నిర్మాణాంతర కార్యక్రమాలు జరుపుకొంటోంది. ఈ సినిమాలో బాక్సింగ్‌ కోచ్‌గా నటిస్తున్న వెంకటేష్‌ ఓ పాట పాడారు. సంతోష్‌ నారాయణ స్వరాలు సమకూర్చారు. ఎన్నో విభిన్న పాత్రలతో మెప్పించిన వెంకటేష్‌ ‘గురు’ కోసం తొలిసారి పాట పాడటం విశేషం. రితికా సింగ్‌ మరో ప్రధాన పాత్ర పోషించిన ఈ చిత్రాన్ని వేసవి కానుకగా విడుదల చేయనున్నారు.