టెలికమ్యూనికేషన్‌ రంగంలో సంస్కరణలు చేపట్టడంలో భాగంగా జనరల్‌ అథారిటీ హిందీ భాషను అదనంగా జోడించనున్నది. యూఏఈ ఎం-ప్రభుత్వం, ట్విట్టర్‌లో సమాచారం కోసం హిందీ భాషను కూడా ఉపయోగించనుంది. ప్రజల ప్రయోజనార్ధం ఈ నిర్ణయం తీసుకుంది యూఏఈ ప్రభుత్వం. సేవలకు సంబంధించిన వివిధ అంశాలు ప్రజలకు ఇంకా ఉపయోగపడేందుకు హిందీ ఉపయోగపడుతుందని యూఏఈ ప్రభుత్వం భావిస్తోంది. యూఏఈ టీఆర్‌ఏ డైరెక్టర్‌ జనరల్‌ చెబుతూ, యూఏఈ ప్రభుత్వం తమ పౌరుల్ని గౌరవిస్తుందని, వారి అభిప్రాయాల్ని పరిగణనలోకి తీసుకుంటుందనీ, వివిధ భాషల, సంస్కృతి వంటి వాటిని గమనిస్తూ, ప్రభుత్వంతో ప్రజలకు సరైన కమ్యూనికేషన్‌ ఉండే విధంగా తగిన చర్యలు తీసుకోవడం జరుగుతుందని అన్నారు. సోషల్‌ మీడియా వేదికల ద్వారా ప్రజల ఆలోచనల్ని ప్రభుత్వం నేరుగా తెలుసుకోవడానికే ఈ ప్రయత్నం చేస్తున్నట్లు చెప్పారాయన. సమాచారం పంపడం, దాన్నుంచి అభిప్రాయాల్ని తెలుసుకోవడం, ఆ అభిప్రాయాల్ని పరిగణనలోకి తీసుకుని తగు విధంగా వ్యవహరించడం అనే మూడు దశలు ఎం-గవర్నమెంట్‌ యొక్క లక్ష్యాలని టీఆర్‌ఏ డైరెక్టర్‌ జనరల్‌ చెప్పారు. 

--సి.శ్రీ(దుబాయ్)