బాహుబలితో ఒకేసారి నేషనల్ స్టార్‌గా ఎదిగిపోయాడు ప్రభాస్. సినిమాకు ప్రపంచ వ్యాప్తంగా గుర్తింపు లభించింది. అందుకేనేమో.. ప్రభాస్ మైనపు విగ్రహాన్ని తన మ్యూజియంలో పెట్టుకుంటామంటూ మేడమ్ టుస్సాడ్స్ మ్యూజియం ముందుకొచ్చింది. గత ఏడాదిలోనే ప్రభాస్ కొలతలను కూడా తీసుకెళ్లారు. బ్యాంకాక్‌లో అతి త్వరలోనే ప్రభాస్ మైనపు బొమ్మ కొలువుదీరబోతోంది. దానికి సంబంధించిన ఫస్ట్‌లుక్‌నే విడుదల చేసింది మేడమ్ టుస్సాడ్స్. కాలకేయుడి తలను ఓ కిరీటంతో పట్టుకుని ఈడ్చుకువెళుతున్న స్టిల్‌లో ఈ విగ్రహం దర్శనమివ్వనుంది. కాగా, 'ఒక్క బాహుబలి.. వంద సినిమాలతో సమానం' అన్న ట్యాగ్ లైన్‌తో ప్రభాస్ బాహుబలి మైనపు బొమ్మ ఏర్పాటు కాబోతోంది. కాగా, మేడమ్ టుస్సాడ్స్‌లో ఏర్పాటు కాబోతున్న తొలి దక్షిణాది నటుడి విగ్రహం ప్రభాస్‌దే కావడం విశేషం.