ఇరాక్‌ నుంచి వచ్చిన ఓ వ్యక్తికి కలరా లక్షణాలు కనిపించడంతో బహ్రెయిన్‌లో కలరా అలర్ట్‌ని ప్రకటించారు. కలరా వ్యాధికి కారణమయ్యే బ్యాక్టీరియాని ఆ వ్యక్తిలో గుర్తించారు ఆసుపత్రి వైద్యులు. ఇరాక్‌ నుంచి పెద్ద సంఖ్యలో ఫిలిగ్రిమ్స్‌ బహ్రెయిన్‌కి వస్తుండడంతో వారితోపాటే దేశంలోకి కలరా వ్యాధి కూడా తరలి వచ్చే అవకాశమున్నందున వైద్య రంగం తరఫున అలర్ట్‌ ప్రకటించారు. కలరాని ఎదుర్కొనేందుకు సిద్ధంగా ఉండాలని ఆసుపత్రులను కోరింది ఆరోగ్య మంత్రిత్వ శాఖ. ఈ సంవత్సరం ఇప్పటిదాకా 851 మంది కలరా వ్యాధికి గురవగా, వారిలో 95 శాతం మంది పూర్తిగా కోలుకున్నట్లు వైద్య శాఖ గణాంకాలు వెల్లడిస్తున్నాయి. పరిశుభ్రమైన ఆహారం తీసుకోవడం, పరిసరాల్ని పరిశుభ్రంగా ఉంచుకోవడం ద్వారా కలరాను నియంత్రించవచ్చు. ఇరాక్‌ నుంచి వచ్చేవారెవరూ ఆహారం, మంచి నీళ్ళు తీసుకురాకూడదని ఆదేశాలు జారీ చేశారు. 2007లో కలరా విజృంభించడంతో 7 వేల మందికి కలరా సోకగా, 10 మంది మృత్యువాతపడ్డారు. 

--యం.వాసు దేవ రావు(మాగల్ఫ్ ప్రతినిధి, బహ్రెయిన్)