ఇస్లామిక్ స్టేట్ టెర్రరిస్టులపై రష్యా ఉక్కుపాదం మోపుతోంది. గత నెల 30న ప్రారంభమై రష్యా దాడులు ఉగ్రవాదులకు భారీ నష్టాన్నే మిగిల్చాయి. సిరియాలోని తూర్పు ప్రాంతాలైన రఖా ప్రావిన్స్, షామిరాపై రష్యా వైమానిక దాడులతో విరుచుకుపడింది. ఈ దాడుల కారణంగా రఖా ప్రావిన్స్‌లో 15 మంది ఐఎస్ ఉగ్రవాదులు మృతి చెందగా, షామిరాలో నలుగురు హతమయ్యారు. ఈ దాడుల్లో ఐఎస్ ఉగ్రవాదులకు చెందిన 12 వాహనాలతో పాటు, స్థావరాలు ధ్వంసమయ్యాయి. సిరియాలో ఇస్లామిక్‌ స్టేట్‌ స్థావరాలపై కొనసాగిస్తున్న వైమానిక దాడులను రష్యా నుండి ఉధృతం చేసినట్లు సైనికాధికారులు వెల్లడించారు. ఐఎస్‌ స్థావరాలను పూర్తి స్థాయిలో నిర్మూలించే వరకూ ఈ ఉధృతిని కొనసాగిస్తామన్నారు. రష్యా యుద్ధ విమానాలకు ప్రాథమికంగా ఐఎస్‌ కమాండ్‌ పాయింట్లు, ఆయుధాగారాలు, పేలుడు పదార్ధాల డిపోలు, కమ్యూనికేషన్‌ కేంద్రాలు, ఆయుధ తయారీ వర్క్‌షాప్‌లు, మిలిటెంట్‌ శిక్షణా శిబిరాలను లక్ష్యంగా నిర్ణయించినట్లు వివరించారు. రష్యా యుద్ధ విమానాలు 50కి పైగా ఐఎస్‌ స్థావరాలపై రోజుకు 60 దాడుల వంతున నిరంతరాయంగా దాడిచేస్తున్నాయన్నారు.