బాలీవుడ్‌ నటుడు అక్షయ్‌కుమార్‌, ప్రముఖ బ్యాడ్మింటన్‌ క్రీడాకారిణి సైనా నెహ్వాల్‌కు మావోయిస్టుల నుంచి హెచ్చరికలు వచ్చాయి. అక్షయ్‌ ఇటీవల జవాన్ల కోసం ‘భారత్‌ కా వీర్‌’ పేరిట వెబ్‌సైట్‌ ప్రారంభించిన సంగతి తెలిసిందే. ఈ వెబ్‌సైట్‌ ద్వారా దాడుల్లో ప్రాణాలు కోల్పోయిన జవాన్ల కుటుంబాలకు ఆర్థిక సాయం చేస్తున్నారు.
సైనా నెహ్వాల్‌ కూడా మార్చిలో సుకుమా జిల్లాలో జరిగిన నక్సలైట్ల దాడుల్లో అమరవీరులైన 12 మంది జవాన్ల కుటుంబాలకు రూ.9లక్షలు ఇచ్చింది. ఈ నేపథ్యంలో ఛత్తీస్‌గడ్‌లోని దక్షిణ బస్తర్‌ జిల్లాలో ఆదివారం పోలీసులకు కరపత్రాలు లభించాయి. దీనిలో అక్షయ్‌, సైనాలు జవాన్ల కుటుంబాలకు సాయం చేయకూడదని హిందీ, గోండి భాషల్లో రాసుంది. ఈ విషయాన్ని పోలీసులు సోమవారం వెల్లడించారు. అయితే ఈ విషయమై ఇప్పటి వరకు అక్షయ్‌ నుంచి కానీ సైనా నుంచి కానీ ఎటువంటి అధికారిక వివరణ ఇవ్వలేదు.