మాస్కోలో వడగళ్ల వర్షం బీభత్సం సృష్టించింది. బలమైన ఈదురుగాలులతో కూడిన వర్షంతో జనజీవనం స్తంభించింది. ఉరుములు, మెరుపుల వర్షానికి మొత్తం 11 మంది మరణించారు. మరో వంద మంది వరకు గాయపడ్డారు. బలమైన గాలివాన ధాటికి చాలా చోట్ల చెట్లు నేలకూలగా.. రవాణా వ్యవస్థ స్తంభించింది. భారీ వర్షాల ధాటికి మాస్కో లోతట్టు ప్రాంతాల్లో ఉన్న 60 వేల మందిని సురక్షిత ప్రాంతాలకు తరలించారు.
రష్యా రాజధాని మాస్కోను ఉరుముల తుఫాను గాలులు కుదిపేశాయి. ప్రాణనష్టానికి కారణమైంది. బలంగా వీచిన గాలులకు రోడ్లపై చెట్లు కూలిపోయాయి, హోర్డింగులు, ట్రాఫిక్ లైట్లు నేలకూలాయి.. రహదారులన్నీ విలయంలో చిక్కుకుపోవడంతో వాటిపై ప్రయాణిస్తున్న వారు వాహనాల్లో భారీగా చిక్కుకుపోయారు.  ఈ విలయంలో పదకొండు మంది మృతి చెందగా..  దాదాపు 50 మందిని ఆస్పత్రులకు తరలించారు. మాస్కోలో ఎలక్ట్రికల్ కేబుల్స్ డామేజ్ కావడంతో సిటీ అంతా పవర్ సప్లైకు అంతరాయం ఏర్పడింది. బలమైన గాలులతోపాటూ వడగళ్ల వర్షం, ఉరుములు పిడుగులు నగర ప్రజలను భయభ్రాంతులకు గురిచేశాయి. ఎప్పుడూ లేనివిధంగా గంటకు 110 కిలోమీటర్ల వేగంతో వీచిన గాలులతో జనం చాలావరకూ ఇళ్ల నుంచి బయటకు రావాలంటేనే వణికిపోయారు. గత వందేళ్లలో ఎప్పుడూ లేనంత ప్రమాదకరమైన తుఫానుగా భావిస్తున్నారు. వివిధ ప్రాంతాల్లో చెట్లు కూలడం వల్ల వాటి కింద పడి ఐదుగురు వరకూ చనిపోయారు. వర్షాలు, గాలుల వల్ల మెట్రో రైళ్లు ఆలస్యమయ్యాయి. మాస్కోలో తుపాను విధ్వంసం, టెన్నిస్ కోర్ట్ రూఫ్ ఎగిరిపోవడం లాంటి వీడియోలు సోషల్ మీడియాలో పెట్టడంతో ఈ విలయం గురించి వేగంగా ప్రపంచమంతా వ్యాపించింది. ఫ్రాన్స్ అధ్యక్షుడితో చర్చల కోసం పారిస్ వెళ్లిన పుతిన్ అక్కడి నుంచే మాస్కోలో పరిస్థితిని సమీక్షించారు.